इनरुवा । सुनसरीको इनरुवा नगरपालिकामा आउँदो स्थानीय तहको निर्वाचनमा नेपाली कांग्रेसले बहुमत ल्याउन सकेमात्र इनरुवामा विकास सम्भव हुने इनरुवा नगरपालिकाका मेयर राजन मेहताले बताएका छन् ।
इनरुवा नगरपालिका वडा नम्बर–८ स्थित रहेको त्रिभुवन माध्यमिक विद्यालय÷क्याम्पस कक्षा ११ को व्यवस्थापन तथा शिक्षा संकायको उद्घाटन तथा पाठयपुस्तक वितरण कार्यक्रमका प्रमुख अतिथि समेत रहेका इनरुवाका मेयर मेहताले इनरुवामा नेपाली कांग्रेसका उम्मेदवारलाई बिजयी गराउनुपर्ने बताएका हुन् ।
निर्वाचन आयोगले आउँदो चैत ५ गते स्थानीय तहको निर्वाचन गर्न सिफारिस गरेको हुनाले सम्भवतः निर्वाचन भएको खण्डमा इनरुवा नगरपालिकामा नेपाली कांग्रेसका उम्मेदवारहरुलाई बिजयी गराउन सकेमात्र इनरुवाको विकास सम्भव हुने उनले बताए ।
इनरुवा नगरपालिका–८ स्थित त्रिभुवन माध्यमिक विद्यालय अर्ता बंकुलवा सुनसरीलाई गत निर्वाचनको बेला घोषणा पत्रमा यस विद्यालयलाई प्राविधिक शिक्षा लागु गर्न प्रतिवद्धता गरेको बताउँदै यस विद्यालयमा परिस्थितीका कारण काम गर्न नसकिए पनि कक्षा ११ को व्यवस्थापन तथा शिक्षा संकायको अनुमति दिलाएर अध्ययन अध्यापन सुरु गर्न सफल भएको बताए ।
इनरुवा नगरपालिकाभित्र घोषणा पत्र अनुसार काम गर्न अठोट राखेपनि विविध कारणले केही कामहरु समयमा गर्न नसकिएकोले अगामी स्थानीय तहको निर्वाचनमा आफुलाई फेरी इनरुवाका मेयर पदमा जिताए प्रतिवद्धताहरु पुरा गर्न सकिने मेयर मेहताको कथन छ । शिक्षा र स्वास्थ्य क्षेत्रमा बढी ध्यान दिएर काम गरेकोले आगामी निर्वाचनमा मेयर पदमा पुनः जिताए इनरुवामा विकासको लहर ल्याउने समेत उनले प्रतिवद्धता व्यक्त गरे ।
त्रिभुवन माध्यमिक विद्यालयका बालबालिकाहरुको उज्जवल भविष्य बनाउनका लागि अभिभावकहरुको भुमिका अपरिहार्य रहेको बताउँदै ग्रामिण क्षेत्रका विद्यालयमा अभिभावहरुले विद्यार्थीहरुलाई भर्ना गराएर शिक्षा प्रदान गराउने सोचलाई प्रशंसा समेत गरे ।
बालबालिकाहरुलाई शान्त वातावरणमा सहज हुने बताउँदै स्थानीय गाउँ ठाउँमा नै शिक्षा क्षेत्रको पहुँच भएकाले अवसरलाई नगुमाउन अभिभावक र बालबालिकाहरुलाई अनुरोध समेत गरेका थिए । त्रिभुवन माविका विद्यार्थीहरुलाई अनुशासनमा रहेर शिक्षा आर्जन गर्नुपर्नेमा जोड दिदै उनले विद्यालयमा सक्दो सहयोग गर्ने समेत उनले प्रतिवद्धता व्यक्त गरे ।
त्यसैगरी इनरुवा नगरपालिका–८ का वडाध्यक्ष रविन्द्र प्रसाद मण्डलले त्रिभुवन माविलाई स्तरोन्नती गर्नका लागि इनरुवाका मेयर मेहता र आफुले पारिश्रमिक रमकबाट ३ कठ्ठा जग्गा किनेर विद्यालयको भौतिक संरचना बनाउन सहयोग गरेको बताए । इनरुवा–८ का बालबालिकाहरुलाई बाहिर अध्ययन गर्न समस्या भएकोलाई मध्यनजर गर्दै बालबालिकाको भविष्यलाई उज्जवल बनाउनका लागि अहिले कक्षा ११ को व्यवस्थापन तथा शिक्षा संकायको पढाई सुरुवात गर्न सहयोग गरेको वडाध्यक्ष मण्डलको भनाई छ ।
बालबालिकाहरुलाई कक्षा १० उर्तिण गरेपछि बाहिर त्रिभुवन माविमा नै कक्षा ११ र १२ मा अध्ययन गर्न सहज हुने उनले बताउँदै आगामी दिनमा यस विद्यालयमा स्नातक तहसम्म लैजाने सोच लिएर आगाडी बढ्ने बताए । त्रिभुवन माविका प्रधानाध्यक जागेश्वर साहले यस विद्यालयमा अथक प्रयासपछि कक्षा ११ संचालन भएको बताए । कक्षा ११ को व्यवस्थापन र शिक्षा संकायमा जम्मा ५५ जना विद्यार्थीहरु अध्ययनरत रहेको समेत उनले बताए ।
आगामी दिनमा सबैको सहयोग पाए स्नातक तहसम्म पुगाउने भएकाले यस क्षेत्रको बालबालिकाहरुलाई अन्यत्र जाने झन्झट हटेर जाने प्रअ साहको भनाई छ । कक्षा ११ व्यवस्थापन तथा शिक्षा संकायका विद्यार्थीहरुलाई पाठयपुस्तक समेत वितरण गरिएको थियो । इनरुवा नगरप्रमुख राजन मेहता, प्रमुख प्रशासकीय डिल्लीराज निरौला, प्रअ जागेश्वर साह, विद्यालय व्यवस्थापन समितिका अध्यक्ष गंगाराम मण्डल, चित्रबहादुर केसी लगायतकाले पाठयपुस्तक वितरण गरेका थिए ।
