हरिनगर । सुनसरीको हरिनगर गाउँपालिकाका अध्यक्ष गफार अन्सारीले छुटेका बाढी पीडीतहरुलाई तत्काल उपलब्ध गराउने बताएका छन् ।
हरिनगर गाउँपालिकाको बिहिवार बसेको कार्यपालिका बैठकले किसानहरुको समस्याहरुलाई मध्यनजर गर्दै ५० प्रतिशत छुटमा गहुको बिउको उपलब्ध गराउने निर्णयसँगै पाकिलाभित्र छुटेका बाढी पीडितहरुलाई तत्काल राहत उपलब्ध गराउने निर्णय गरेको हो ।
हरिनगर गाउँपालिकाको कार्यपालिकाको बसेको बैठकले बाढी पीडितहरुलाई पहिलो चरणमा राहत वितरण गरिसकेको हुदाँ बाँकी रहेकोलाई तथ्याङ्क संकलन गरेर राहत वितरण गर्न वडा कार्यालयहरुलाई अनुरोध गरेको छ ।
अविरल वर्षाका कारण हरिनगर गाउँपालिकाको ७ वटै वडामा २०८ वटा पशु चौपायाको क्षति भएको छ भने ९ सय ७३ वटा पंक्षीको क्षति भएको छ ।
९ दशमलव ४ हेक्टर माछा, २४३३ दशमलव ९५ हेक्टर धान खेती, १७ दशमलव ७३ हेक्टर उखु खेती, २६७ दशमलव ३२ हेक्टर सनपाट खेती, ६० दशमलव ३१ हेक्टर आलु खेती, ४७२ दशमलव ९७ हेक्टर तरकारी खेती, २९५ निजी घर भवनमा क्षति, २९ वटा गोठमा क्षति भएको छ । जसमध्ये पशुचौपाया २ सय ८ मध्ये ३० थान गाईभैसी र १ सय ७८ थान बाख्रा रहेका छन् ।
