पप्पु यादव
भण्टाबारी । सुनसरीको कोशी गाउँपालिका–८ मा यात्रुवाहक बसको ठक्करबाट दुई जनाको ज्यान गएको छ ।
कोशी गाउँपालिका–८ भण्टाबारीको ट्राफिक पोष्ट नजिकै पुर्वबाट पश्चिमतर्फ जाँदै गरेको यात्रुबाहक बसले पश्चिमबाट पुर्वतर्फ आउँदै गरेको मोटरसाईकललाई ठक्कर दिदाँ दुई जनाको ज्यान गएको हो ।
प्रदेश–१–०१÷००१ख ३५३० नम्बरको यात्रुबाहक बसले प्रदेश–२–०१÷००१ प ०७६३ नम्बरको मोटरसाईकललाई ठक्कर दिदाँ मोटरसाईकल चालक सहित सोही मोटरसाईकलमा सवार भएका एक जना घाइते भएको थियो ।
उनीहरुको अवस्था चिन्ताजनक भएपछि उपचारका लागि जिल्ला अस्पताल इनरुवा लैजाने क्रममा बाटोमा दुवैजनाको ज्यान गएको सुनसरी प्रहरीले जनाएको छ ।
मृत्यु हुनेहरुमा कोशी–८ का २२ वर्षिय अल्ताफ मन्सुरी र भारत विहार राज्य अन्र्तगत सुपौल जिल्लाको घटाहा गोविन्दपुर बस्ने २२ वर्षिय मोहम्मद ग्यासुद्धिन रहेका छन् ।
कोशी–८ भण्टाबारीमा दुर्घटना भएपछि स्थानीयहरुले नाराबाजी गर्दै चारघण्टा लोकमार्ग अवरुद्ध गरेका थिए । कोशी गाउँपालिकाका अध्यक्ष ऐयुव अन्सारी र जिल्ला प्रहरी कार्यालय सुनसरीको प्रहरी नायव उपरीक्षक नरेन्द्रकुमार कार्की लगायतका टोलीले स्थानीयहरुसँग वार्ता गरेपछि अवरुद्ध लोकमार्ग सूचारु भएको थियो ।
स्थानीयहरुले चारघण्टा बाटो अवरुद्ध गर्दै ट्राफिक पोष्ट हटाउनु पर्ने माग राख्दै आन्दोलित बनेका थिए । मृतक परिवारलाई क्षतिपुर्ती सहित बसचालकलाई कार्वाही गर्न माग समेत गरिएको थियो ।
मृतक मन्सुरी र मोहम्मदको जिल्ला अस्पताल इनरुवामा पोष्टपार्टम गरिएको थियो । मुस्लिम धर्म अनुसार उनीहरुको अन्त्येष्टि गरिने समाचार श्रोतले जनाएको छ ।
