इनरुवा । सुनसरीको देवानगंज गाउँपालिकालाई समृद्ध बनाउनका लागि युवा संजाल गठन भएको छ ।
देवानगंज गाउँपालिकाका युवाहरुको सक्रियतामा राम्रो देवानगंज, हाम्रो देवानगंज, हाम्रो गाउँपालिका, समृद्ध गाउँपालिका बनाउने उद्देश्यले युवा संजाल गठन भएको हो ।
नासा इन्भेष्टमेन्ट प्रालि विराटनगरका प्रमुख कार्यकारी अधिकृत अरविन्द मेहताको संयोजकत्वमा युवा संजाल गठन गरेको हो । सहसंयोजक नेहा कुमारी सिंह, सचिव रोशन मेहता, सहसचिव मिना महत र कोषाध्यक्ष रानी मेहता रहेका छन् ।
त्यसैगरी सदस्यहरुमा दिपेश मेहता,रामकुमार मेहता, पंकज मेहता, मुरली मनोहर मेहता, राकेश यादव, विजय मेहता, अमित यादव, दिपक शर्मा, प्रदीप मेहता र रेणु मेहता रहेका छन ।
“स्थानीय सीप, संस्कृति र मौलिकतामा विविधता, देवानगंज गाउँपालिकामा समृद्धिको आवश्यकता” भन्ने मुल नाराका साथ युवाहरुलाई व्यवसायिक बनाई गाउँपालिकालाई समृद्धि बनाउने उद्देश्यले युवा संजाल गठन भएको संयोजक मेहताले बताएका छन् ।
देवानगंज युवा संजालले पालिकामा आर्थिक क्रान्ति सहित युवाहरुलाई बिभिन्न क्षेत्रमा प्रोत्साहन गर्ने र बेरोजगार युवाहरुलाई रोजगारीको सिर्जना गर्ने वातावरण मिलाउने तथा पालिकालाई समृद्धि बनाउने अठोट लिएको उनको कथन छ ।
सुनसरीको १२ वटा स्थानीय तहहरु मध्ये देवानगंज गाउँपालिकामा युवाहरु सक्रिय भएर पालिकालाई समृद्ध बनाउने तर्फ अगाडी बढेको छ । पालिकाका भित्र कर्णधार युवाहरुलाई अवसर प्रदान गर्ने र शिक्षा, स्वास्थ्य क्षेत्रमा निगरानी बढाई सुधारात्मक कामहरुलाई अगाडी बढाउने र सुनसरीमै नमुना पालिकाको रुपमा घोषणा गर्ने समेत लक्ष्य रहेको बुझिएको छ ।
देवानगंज युवा संजालले पालिका भित्र रहेको कुरीति, विसंगति, कुप्रथालाई न्युनीकरण गर्नका लागि अग्रसर भई जनचेतना फैलाउने कार्यमा अहम भुमिका खेल्ने र समृद्ध पालिका बनाउनका लागि युवाहरुको एकल प्रयासमा नभई समग्र गाउँवासीको साथ र सहयोगले नमुना पालिका बनाउन अग्रसर हुने संयोजक मेहताको भनाई छ ।
उनले भने, दवाव, प्रभाव,अभावले नभई स्वभावले चुनौतीपूर्ण कार्य गर्न तयार रहेको छु । पालिकालाई समृद्ध बनाउन धेरै चुनौती भएपनि युवा संजालले चिर्दै अगाडी बढ्नेमा ढुक्क रहेको छु ।
