गनेश कुमार यादव
इनरुवा । सुनसरीको इनरुवा नगरपालिका वडा नम्बर–३ जनजागृति प्रगती र करेसी टोलमा प्रहरी बिट हुदाँ पनि प्रहरीको अनुउपस्थितीले दिनहुँ झैगडाको घटना बढ्न थालेको छ । इनरुवा–३ मा प्रहरी विटमा प्रहरी नबस्दा झैझगडाको घटना बढ्न थालेको हो ।
इनरुवा–३ जनजागृति प्रगती र करेसी टोलमा प्रहरी नबसेको कारण झैझगडा गाली गलौज गर्ने समुह सक्रिय भएका कारण स्थानीयबासीहरुलाई बस्न समस्या भएको छ । समाजका युवा र केही स्थानीयहरुले रातीको समयमा आपसमा गाली गलौज र झैझगडा गर्ने गरेकोले सुत्न समस्या भएको स्थानीयहरुले गुनासो गरेका छन् ।
रातीको समयमा युवाहरुको समुह र केही स्थानीय बासीन्दाहरुले मादक पदार्थ सेवन गरेर होहल्ला गर्ने र गाली गलौजले समाज सुन्दर बन्न नसक्ने गौरव पौदारले बताएका छन् । उनका अनुसार होहल्ला र झैझगडा दिनँहु हुनाले समाजका बालबालिकाहरुमा असर पर्ने भएकोले शान्ति सुरक्षा कायम गर्नुपर्नेछ ।
सुनसरी प्रहरीले शान्ति सुरक्षा प्रदान नगरेको केही तत्वहरुका कारण समाजको वातावरण विगर्दै गएकोले प्रहरी विटमा प्रहरी बस्नुपर्ने समेत उनले माग गरेका छन् । २०७६÷०७÷२३ गते इनरुवा–३ का वडा अध्यक्ष कालुराम गुरुङ्गले नेपाल प्रहरी बिटको उद्घाटन गरेपनि हाल सो बिटमा प्रहरी नबसेको स्थानीयबासीहरुले गुनासो गरेका छन् ।
शान्ति सुरक्षा प्रदान गर्नका लागि प्रहरी बिट स्थापना गरेपनि नामको लागि मात्र प्रहरी बिट भएको समेत उनीहरुले गुनासो गरेका छन् । इनरुवा–३ को जनजागृति प्रगती र करेसी टोलमा सुरक्षा व्यवस्था कडा गरेपछि होहल्ला र झैझगडा गर्ने व्यक्तिहरुलाई नियन्त्रण लिई कार्वाही गरिए सो समुह हराएर जाने समेत समाजका अगुवाहरुको भनाई छ ।
प्रहरी बिट उद्घाटन हुँदा स्थानियहरु निकै खुशी र आफुलाई सुरक्षित ठानेका थिए । प्रहरी बिट उद्घाटन भएको केही हप्ता पश्चात प्रहरी बिटमा प्रहरीहरु जान छाडिएको स्थानियहरु बताउँछन् ।
प्रहरी नबसेको कारण सो स्थानमा सामान्य देखी ठुला झैझगडा गाली गलौज,बाटोमा हिड्ने सवारी साधनलनलाई रोकेर धम्की दिने जस्ता क्रियाक्रलाप दिनहुँ बढ्दै गएपनि प्रहरी बिटमा प्रहरी नराखिएको इनरुवा–३ का सुरेश पौडेलले बताए । प्रहरी नबसेको कारण रातिको समयामा केही व्यक्ति जाँड, रक्सि लगायत लागुपदार्थ सेवन गरी सामान्य कुरामा पनि झै झगडा गाली गलौज गरेर स्थानियलाई दुख दिइरहेको स्थानियहरुले गुनासो गरेका छन् । प्रहरी बिटमा प्रहरीहरुलाई बस्न आवश्यक रहेकोले सम्वन्धीत निकायको ध्यान जरुरी रहेको समाजका अगुवाहरुको भनाई छ ।
