इनरुवा । इनरुवा अस्पताल सुधार संघर्ष समितिले माग पुरा नभएको भन्दै जिल्ला समन्वय समिति सुनसरीमा आज तालावन्दी गर्ने भएको छ । इनरुवा अस्पताल सुधारका लागि एक वर्षदेखी आन्दोलन गर्दै आइरहेको इनरुवा अस्पताल सुधार संघर्ष समितिले अस्पताल विकास समितिको अध्यक्ष गोपालराज भण्डारीको कार्यलयमा तालाबन्दी गर्ने भएको हो ।
इनरुवा अस्पताल सुधार संघर्ष समितिले अस्पताल विकास समिति, इनरुवा नगरपालिका, जिल्ला प्रशासन कार्यालय सुनसरी, जिल्ला प्रहरी कार्यालय सुनसरी, प्रदेश नम्बर–१ का मुख्यमन्त्री लगायतकालाई अस्पतालको समस्यालाई सुधारको माग गर्दै २५ बुँदे ज्ञापन पत्र बुझाएका थिए ।
अस्पताल सुधारका लागि एक वर्षदेखी लगातार आवाज उठाएपनि कुनै वास्ता नगरेको भन्दै इनरुवा अस्पताल सुधार संघर्ष समितिका संयोजक दिलिप चन साहुले अस्पताल विकास समितिको अध्यक्ष समेत रहेका भण्डारीको कार्यालयमा तालावन्दी गर्ने बताएका छन् । सुधार समितिले एक हप्तासम्म धर्ना कार्यक्रम मार्फत अस्पताल सुधारको लागि आवाज उठाएपनि कुनै सुनवाई नभएकोले आन्दोलन कार्यक्रमलाई निरन्तरता दिदै अगाडी बढ्ने संयोजक साहुले बताए ।
इनरुवा अस्पताल सुधार हुनुको साट्टो अझै बिग्रिएको भन्दै मंसिर १ गते बुधबार बाट आन्दोलन सुरुवात गरेको उनको कथन छ । बुधवार बिहान भेला भएर जिल्ला समन्वय समितिका अध्यक्ष भण्डारीको कार्यालयमा तालावन्दी गर्ने कार्यक्रम रहेको समितिले जनाएको छ ।
