इनरुवा । नेपाली कांग्रेसको १४ औं महाधिवेशन अन्र्तगत प्रदेश १ को नेतृत्वका लागि भएको निर्वाचनमा एक हजार सात सय ५३ मत खसेको छ । प्रदेश १ को प्रथम अधिवेशनबाट नेतृत्व छनौटका लागि शनिवार साझ बिराटनगरमा मतदान सम्पन्न भएको छ ।
प्रदेश १ को १४ जिल्लाबाट आएका मतदाताहरुले नेतृत्व छनौट गर्नका लागि मतदान गरेका थिए ।
प्रदेश १ को नेपाली कांग्रेसको निर्वाचनमा एक हजार सात सय ५३ मत खसेको मतदान अधिकृत भरतबहादुर थापाले जानकारी दिएका छन् । प्रदेश १ मा एक हजार आठ सय पाँच जना मतदाता मध्ये एक हजार सात सय ५३ मत खसेको मतदान अधिकृत थापाले बताउँदै मतगणना भने आइतबार बिहान ८ बजेबाट सुरु हुने उनले बताए ।
प्रदेश १ अधिवेशनमा संस्थापन पक्षबाट सभापति पदका उम्मेदवार उद्धव थापा र संस्थापनइतर पक्षबाट गुरुराज घिमिरे बीच कडा प्रतिस्पर्धा रहेपनि संस्थापन पक्षबाट सभापति पदका उम्मेदवार थापा बिजयी हुने मतदाताहरुको भनाई छ । शनिबार बिहान ८ बजेबाट मतदान सुरु गर्ने कार्यसूची रहेपनि विवादका कारण साढे ६ घण्टा ढिलो दिउँसो साढे २ बजेबाट मतदान सुरु भएको थियो ।
त्यसैगरी संस्थापन पक्षबाट उपसभापति पदका उम्मेदवार रमेशजंग रायमाझी र टंक प्रसाद राई र संस्थापनइतर पक्षबाट गोविन्द प्रसाद ढुंगाना(केदार) र विश्वनाथ रिजाल बीच कडा प्रतिस्पर्धा रहेपनि संस्थापन पक्षका उम्मेदवार बिजयी हुने निश्चित भएको छ ।
त्यसैगरी संस्थापन पक्षबाट महामन्त्री पदका उम्मेदवार पदम सुन्दर पालुङ्गवा र भूपेन्द्र राई तथा संस्थापनइतर पक्षबाट उमेश थापा र दिपन कुमार श्रेष्ठबीच प्रतिस्पर्धा निश्चित छ ।
त्यसैगरी संस्थापन पक्षबाट सह–महामन्त्री पदको (महिला) कोटाबाट प्रमिला गच्छदार र संस्थापनइतर पक्षबाट सिता कार्कीबीच प्रतिस्पर्धा रहेपनि संस्थापन पक्षका उम्मेदवारको बिजयी हुने निश्चित देखिएको छ ।
त्यसैगरी संस्थापन पक्षबाट
सह–महामन्त्री पदका उम्मेदवार खड्ग फागो र विनोद कुमार बस्नेत र संस्थापनइतर पक्षबाट रोहित कुमार साह, बीरकाजी राई र शभचन्द्र राईबीच प्रतिस्पर्धा रहेपनि यस पदमा दुई जना निर्वाचित हुनेछ ।
नेपाली कांग्रेस प्रदेश १ मा ८८ जनाको कार्यसमिति रहनेछ । प्रदेश १ अधिवेशनमा भोक्राहा नरसिंह गाउँपालिकाका नेता तथा नेपाल मुस्लिम संघ १ नम्बर प्रदेशका सभापति ईसराईल मंसुरीले अन्तिममा मतदान गरेको थियो । अन्तिम मत मंसुरीले खसालेपछि मतदान कार्य सम्पन्न भएको थियो ।
