इनरुवा । नेपाली कांग्रेसका निवर्तमान सभापति तथा प्रदेश–१ का संसदीय दलका नेता राजीव कोइराला र संघीय सांसद सीताराम मेहता नेपाली कांग्रेसको केन्द्रीय सदस्यको दौडाहामा रहेका छन् ।
नेपाली कांग्रेसको १४ औं महाधिवेशन मंसिर २४ गतेदेखी सुरु हुने भएपछि इनरुवाका दुई नेता कोइराला र मेहता नेपाली कांग्रेसको केन्द्रीय सदस्यका लागि चर्चामा रहेका छन् ।
नेपाली कांग्रेसको प्रदेश १ सभापति पदका नेता कोइरालालाई टिकट नदिएपछि अहिले केन्द्रीय सदस्यमा अघि सारेको कांग्रेसका नेताहरु बताउँछन् । प्रदेश–१ को मुख्यमन्त्री बन्ने चर्चा भएपनि बनाउन नसकेकोप्रति कांग्रेसी नेताहरु चिन्तित भएर अवसर प्रदान गर्नका लागि अहिले नेता कोइरालालाई केन्द्रीय सदस्यमा अघि सारेका हुन् ।
सुनसरीमा कांग्रेसलाई मजबुत बनाउन आफनो कार्यकालमा सफल भएका नेता कोइरालाले प्रदेश–१ को मुख्यमन्त्री र अधिवेशनमा प्रदेशको सभापतिको टिकट नपाएपछि आलोचना हुन थालेपछि केन्द्रीय नेताहरुले उनलाई १४ औं महाधिवेशनमा केन्द्रीय सदस्य सिफारिस गर्ने भएका हुन् ।
यसैगरी सुनसरी क्षेत्र नम्बर–२ बाट प्रतिनिधि सभा सदस्यमा निर्वाचित भएका सीताराम मेहता पनि केन्द्रीय सदस्यको लाइनमा रहेका छन् । नेपाली कांग्रेसको १४ औं महाधिवेशनमा मधेशी कोटाबाट केन्द्रीय सदस्य पदका उम्मेदवारी घोषणा गरेका हुन् । मधेशी समुदायबाट प्रतिनिधित्व हुने गरी मधेशी कोटामा समावेश गरी केन्द्रीय सदस्य पदमा उम्मेदवार बनाउनुपर्ने उनका सर्मथकहरुले बताएका छन् ।
नेपाली कांग्रेसका सभापति तथा वर्तमान प्रधानमन्त्री शेरबहादुर देउवाको विश्वासिला पात्र मानिएका संघीय सांसद सीताराम मेहतालाई मधेशी कोटाबाट केन्द्रीय सदस्य पदका लागि आफु निकटका नेताहरुसँग वहस र छलफल जारी रहेको छ । नेता कोइराला र मेहता सुनसरी क्षेत्र नम्बर–२ बाट केन्द्रीय महाधिवेशन प्रतिनिधिमा निर्वाचित भएका थिए ।
यता भोक्राहा नरसिंहका युवा नेता डा.अबुल हुसैन अन्सारी पनि मुस्लिम कोटाबाट केन्द्रीय सदस्य पदका उम्मेदवार हुन् । सुनसरी क्षेत्र नम्बर–४ बाट अन्सारी केन्द्रीय महाधिवेशन प्रतिनिधिमा भारी मतले बिजयी भएका थिए । डा.अन्सारीले कांग्रेसको १४ औं महाधिवेशनमा मुस्लिम कोटाबाट केन्द्रीय सदस्य पदमा उम्मेदवारी रहने बताए । डा. अन्सारी सुनसरी क्षेत्र नम्बर–४ का युवा नेता हुन् ।
सुनसरी क्षेत्र नम्बर–४ का प्रतिनिधि सभा सदस्य तथा सुचना संचार तथा प्रविधि मन्त्री ज्ञानेन्द्रबहादुर कार्कीको क्षेत्रका युवा नेता डा. अबुल अन्सारीले मुस्लिम कोटाबाट केन्द्रीय सदस्य पदमा उम्मेदवारी दिने घोषणा गरेका हुन् । डा. अन्सारी केन्द्रीय राजनीतिमा पकड बनाएका युवा नेता भएकाले केन्द्रीय सदस्यमा टिकट पाउने सम्भावना रहेको समचार श्रोतले जनाएको छ ।
सुनसरीको इनरुवाबाट दुई नेता कोइराला र मेहता तथा भोक्राहा नरसिंह गाउँपालिकाका डा. अन्सारी लगायत तीनजनाले केन्द्रीय सदस्यमा उम्मेदवारी दिने घोषणा गरेका छन् । तीन जना नेताहरुले केन्द्रीय सदस्यमा उम्मेदवारी घोषणा गरेपनि क–कसले टिकट पाउने र कुन खेमाबाट टिकट पाउने बारेमा तीन जना नेताहरुको बारेमा आ–आफना प्यानलमा बहस र छलफल जारी रहेको समाचार श्रोतले जनाएको छ ।
