इनरुवा । सुनसरीको इनरुवाबाट प्रकाशन हुँदै आएको सत्य संसार साप्ताहिक पत्रिकाको पाँचौ वार्षिक उत्सवको अवसरमा सुनसरीका प्रमुख जिल्ला अधिकारी सहित ६ जनालाई सम्मान गरिएको छ ।
सुनसरीको जिल्ला प्रशासन कार्यालय सुनसरीमा आयोजना गरिएको सम्मान कार्यक्रममा सुनसरीका प्रमुख जिल्ला अधिकारी इन्द्रदेव यादव सहित ६ जनालाई पत्रिकाको वार्षिक उत्सवको अवसरमा सम्मान गरिएको हो ।
प्रमुख जिल्ला अधिकारी यादव सुनसरी जिल्लामा आएर कार्यभार सम्हालेको दुई महिनामा सूचना प्रवाह र पत्रकारहरुसँगको समन्वय र सहकार्य तथा कार्यालयहरुको निरीक्षणलाई निरन्तरता दिएको भन्दै सत्य संसार साप्ताहिकले आफनो पाँचौ वार्षिक उत्सवको अवसरमा सु्शासन सम्मानवाट सम्मानित भएको पत्रिकाकी प्रकाशक ममता यादवले जानकारी दिएकी छिन् ।
त्यसैगरी लामो समयदेखी इनरुवामा रहेर पत्रकारीता गर्दै आएका वर्णमाला दैनिकका राजेन्द्र पोखरेललाई युवा सृजनशिल सम्मानबाट सम्मानित गरेको हो । त्यसैगरी साहित्य सम्मानबाट कवि बिमला पोखरेल सम्मानित भएको प्रकाशक यादवले बताएकी छिन् । प्रजिअ यादव, पत्रकार पोखरेल, साहित्कार पोखरेललाई दोसल्ला र कदर पत्रले सम्मानित गरिएको थियो ।
पत्रिकाको वार्षिक उत्सवको अवसरमा मानव अधिकार समूह कोशीका सदस्य राजकुमार शर्मा, मानव अधिकार समूह भोक्राहा नरसिंहका निवर्तमान अध्यक्ष शोभा मेहता, सदस्य नुनुलाल साहलाई समेत सम्मान गरिएको छ ।
ग्रामिण क्षेत्रमा बसोवास गरेपनि मानव अधिकारको क्षेत्रमा योगदान पुर्याएको भन्दै सम्मान गरेको इन्सेक सुनसरी जिल्ला प्रतिनिधि जयकृष्ण यादवले बताएका छन् ।
तीनै जनालाई कार्यक्रमका प्रमुख अथिति सुनसरीका प्रमुख जिल्ला अधिकारी इन्द्रदेव यादवले कदर पत्र र दोसल्ला ओढाएर सम्मान गरेका थिए ।
कार्यक्रममा सुनसरीका प्रमुख जिल्ला अधिकारी इन्द्रदेव यादव, इनरुवा नगरपालिकाकी उपमेयर जमुना गौतम पोखरेल, जिल्ला प्रहरी कार्यालयका प्रहरी नायव उपरीक्षक नरेन्द्र कुमार कार्की, नेकपा एमालेका अध्यक्ष खेमराज पोखरेल, नागरिक समाजका अगुवा पुरुषोतम घिमिरे, चितरञ्जन यादव, नेपाली कांग्रेसका युवा नेता धिरज भट्टराई, कृष्ण कुमार भगत –बब्लु), संचारकर्मी, गैससका प्रतिनिधिहरुको सहभागीता रहेको थियो ।
