इनरुवा । नेपाली कांग्रेसको १४ औं महाधिवेशनमा इनरुवाका दुई नेता र भोक्राहा नरसिंह गाउँपालिकाका एक नेता गरी तीन जनाले नेपाली कांग्रेसका केन्द्रीय सदस्य पदमा मनोनयन दर्ता गरेका छन् ।
नेपाली कांग्रेसको १४ औं महाधिवेशनको कार्यतालिका अनुसार शनिवार इनरुवाका दुई नेता र भोक्राहा नरसिंह गाउँपालिका एक नेता गरी तीन जनाले केन्द्रीय सदस्य पदमा मनोनयन दर्ता गरेका हुन् । नेपाली कांग्रेस सुनसरीका निवर्तमान सभापति एवं १ नम्बर प्रदेश का संसदीय दलका नेता राजीव कोइराला र सुनसरी क्षेत्र नम्बर २ बाट प्रतिनिधि सभा सदस्य एवं पुर्व राज्यमन्त्री सीताराम मेहताले अधिवेशनमा नेपाली कांग्रेसको केन्द्रीय सदस्य पदमा मनोननय दर्ता गरेका छन् ।
यसैगरी भोक्राहा नरसिंह गाउँपालिकाका नेता डाक्टर अबुल हुसैन अन्सारीले कांग्रेसको १४ औं महाधिवेशनमा शनिवार खुल्ला सदस्यमा मनोनयन दर्ता गरेका छन् । अन्सारीको मुस्लिम कोटाबाट केन्द्रीय सदस्य पदमा उम्मेदवारी दिने चर्चा रहेपनि मनोनयन दर्ता गर्ने समयमा खुल्ला सदस्यमा मनोननय दर्ता गरिएको छ ।
नेपाली कांग्रेसको अधिवेशनमा नेता कोइराला र मेहताले केन्द्रीय सदस्य पदमा मनोनयन दर्ता गरेका छन् । उनीहरु सुनसरी क्षेत्र नम्बर २ बाट केन्द्रीय महाधिवेशन प्रतिनिधिमा निर्वाचित भएका थिए । प्रदेश १ को अधिवेशनमा नेता कोइरालालाई प्रदेश सभापति बनाउने चर्चा रहेपनि अन्तिम अवस्थामा सो पदको टिकट नदिएपछि उनलाई केन्द्रीय सदस्य बनाउने आश्वासन पछि आज मनोनयन दर्ता गरेका हुन् ।
नेता मेहता सुनसरी क्षेत्र नम्बर २ का लोकप्रिय नेताका रुपमा चिनिन्छ भने नेता कोइराला गुट उपगुटलाई अन्त्य गरी सबैको मन जित्ने सक्ने कुशल नेतृत्व गर्ने क्षमतावान नेता भएकाले उनलाई जिताउन आवश्यक रहेको समर्थकहरुले बताएका छन् । सुनसरी क्षेत्र नम्बर ४ बाट अधिवेशनमा डाक्टर अबुल हुसैन केन्द्रीय महाधिवेशन प्रतिनिधिमा निर्वाचित भएका थिए ।
नेपाली कांग्रेसका केन्द्रीय सदस्यमा तीन जनाले उम्मेदवारी दर्ता गर्न जादा उनका समर्थकहरुले बिभिन्न नारावाजी गर्दै र्याली प्रदर्शन गर्दै काठमाण्डौंको राष्टिय सभागृहमा पुगेर मनोनयन दर्ता गरेका हुन् । उनीहरुलाई जिताउन उनका समर्थकहरुले काठमाण्डौं पुगेर भोट माग्ने क्रम जारी रहेको छ भने केन्द्रीय सदस्य पदमा उम्मेदवार नेता कोइराला, मेहता र अन्सारी मतदाताहरुसँग मत माग्न व्यस्त भएका छन् ।
