हरिनगरा । सुनसरीको हरिनगर गाउँपालिका–४ स्थित रहेको श्री जय भवानी बचत तथा ऋण सहकारी संस्था लिमिटेडको १५ औं साधारण सभा शनिवार सम्पन्न भएको छ ।
श्री जय भवानी बचत तथा ऋण सहकारी संस्था लिमिटेडको १५ औं साधारण सभा हरिनगर माध्यमिक विधालय हरिनगरामा सम्पन्न भएको हो ।
साधारण सभाका प्रमुख अतिथि हरिनगर गाउँपालिकाकी उपाध्यक्ष रिमझिम कुमारी भगतले उद्घाटन कार्यक्रमलाई सम्वोधन गर्दै सहकारीको विकासमा महिलाहरुको भुमिका अपरिहार्य रहेको बताएकी छिन् ।
पालिका उपाध्यक्ष भगतले साधारण सभा कार्यक्रमलाई दीप प्रज्वलन र कार्यक्रमको ब्यानर पढेर उद्घाटन गर्दै हरिनगर गाउँपालिका–४ मा महिलाहरुको बचत गर्ने बानी विकास भएसँगै सहकारीको विकास गर्नतर्फ ध्यान गएकोले सहकारीहरु नमुना बन्दै गएको बताएकी हुन् ।
साधारण सभाको पुर्ण सफलताको शुभकामना व्यक्त गर्दै पालिका उपाध्यक्ष भगतले महिलाहरुको सहभागिता र सहकारीमा पुरुष भन्दा बढी बचत गर्ने बानी महिलाहरुको रहेको हुदाँ यस सहकारीले प्रगतिको बाटोमा फड्को मारेको बताईन् ।
श्री जय भवानी बचत तथा ऋण सहकारी संस्था लिमिटेड हरिनगर–४ ले सहकारीको अवधारणा ल्याएर महिलासँगै पुरुषहरुलाई एक ठाउँमा जोड्न मदत पुर्याएको उनले बताईन् । हरिनगर–४ को पुरानो सहकारी भएकोले २५ वटा कुर्सी व्यक्तिगततर्फ अनुदान गर्ने घोषणा समेत उनले गरेकी छिन् ।
कार्यक्रमका विशिष्ट अतिथि हरिनगर–४ का वडाध्यक्ष सुदिलाल मेहताले सहकारी शिक्षातर्फ जोड दिनुपर्ने बताए । सहकारीमा आवद्ध भएका व्यक्तिहरुलाई प्रशिक्षण दिनुपर्ने र आवश्यकता अनुसार समय समयमा सहकारीको उद्देश्यमाथि प्रकाश पार्नका लागि श्री जय भवानीले भुमिका खेल्नुपर्ने बताए ।
सहकारीको विकास हरिनगरमा भएपनि आर्थिक लाभको मुल्यांकन गर्न आवश्यक रहेको समेत उनले बताए । वडाध्यक्ष मेहताले सहकारीको विकासले हरिनगर–४ लाई समेत मदत पुगेको बताउँदै आर्थिक लाभ, बचत र पुँजीको बारेमा सबै शेयरसदस्यहरुले सहकारीको शिक्षामार्फत अगाडी बढ्नुपर्ने बताए ।
त्यसैगरी नेपाली कांग्रेस सुनसरी–४ प्रदेश (ख) का उपसभापति शिवहरी श्रेष्ठले सबैको माया र स्नेहका कारण श्री जय भवानी १५ औं साधारण सभा मनाउन सफल भएको बताए । सहकारीले सबैलाई एकजुट गरेर अगाडी बढेको हुदाँ कुनै पनि हिनामिना नगरी पारदर्शि ढङ्गबाट अगाडी बढेको उनले बताए । श्री जय भवानीले सबैको होसला पाएर लामो समयदेखी काम गर्दै आएकोले सबैको मन र मस्तिष्कमा बस्न सफल भएको उनले बताउँदै आगामी दिनमा पनि सबैको माया, प्रेम र स्नेह सहकारीको विकासमा सहयोग पुग्ने उनले बताए ।
श्री जय भवानी बचत तथा ऋण सहकारी संस्था लिमिटेड हरिनगर–४ का अध्यक्ष खेलानन्द लाल देवले प्रगति विवरण प्रतिवेदन प्रस्तुत गरेका थिए । संस्थाका अध्यक्ष देवले आर्थिक वर्ष २०७७÷०७८ को आय व्यय प्रस्तुत गर्दै ऋण प्रवाहबाट प्राप्त व्याज रकम १७ लाख १८ हजार ३५६ लगानीबाट प्राप्त व्याज रकम ५८ हजार ७४२ रुपैयाँ र अन्य आम्दानीबाट प्राप्त एक लाख ५३ हजार ६६० गरि कुल आम्दानी रकम १९ लाख ३० हजार ७५८ भएको जानकारी गराएका थिए ।
त्यसैगरी कर्मचारी पारिश्रमिक रकम ३ लाख ६६ हजार ९६०, व्याज खर्च रकम ८ लाख १७ हजार ८५७ एवं वितिय सबै संचालन खर्च ३ लाख ९६ हजार १८० रुपैयाँ गरि कुल खर्च १५ लाख ८० हजार ९९७ रुपैयाँमा कट्टा गरि खुद मुनाफा ३ लाख ४९ हजार ७६१ रुपैयाँ ५२ पैसा भएको संस्थाका अध्यक्ष खेलानन्द लाल देवले प्रस्तुत गरेको प्रतिवेदनमा उल्लेख गरिएको छ ।
संस्थाको १५ औं साधारण सभाको अवसरमा उत्कृष्ट बचतकर्तातर्फ हरिनगर–३ गौतमपुरका सन्तोष कुमार मेहता र उत्कृष्ट ऋणतर्फ हरिनगर–४ का धिरज कुमार देवलाई सम्मान समेत गरिएको थियो ।
संस्थाका उपाध्यक्ष शिवकुमार मेहताले स्वागत मन्तब्य व्यक्त गरेका थिए भने कार्यक्रम संचालन सुनिल कुमार साहले गरेका थिए । त्यसैगरी लेखा संयोजक सुर्यनारायण यादवले समेत प्रतिवेदन प्रस्तुत गरेका थिए । कार्यक्रममा हरिनगर प्राथमिक स्वास्थ्य केन्द्रका पुर्व इन्चार्ज माधवलाल देव, जिल्ला सहकारी संघ सुनसरीका सचिव नविन कुमार पाल लगायतकाले श्री जय भवानी बचत तथा ऋण सहकारी संस्था लिमिटेडको पुर्ण सफलताको शुभकामना व्यक्त गरेका थिए ।
