इनरुवा । नेपाल कम्युनिष्ट पार्टी एमाले सुनसरीको ७ औं जिल्ला अधिवेशनमा अध्यक्ष पदमा खेमराज पोखरेल र सचिव पदमा देवानन्द मेहताको चर्चा चलेको छ । नेकपा एमाले सुनसरीको ७ औं जिल्ला अधिवेशनको उद्घाटन आज हुन गइरहेको बेला अध्यक्षमा पोखरेल र सचिव पदमा मेहताको चर्चा चलेको हो ।
नेकपा एमाले सुनसरीको अध्यक्ष पदमा तीन जनाको दावी रहेको छ । अध्यक्ष पदका आकांक्षीहरु खेमराज पोखरेल, रेवती भण्डारी र द्धारिकलाल चौधरी रहेका छन् । पोखरेल वर्तमान अध्यक्ष हुन भने रेवति भण्डारी पुर्व अध्यक्ष हुन् । द्धारिकलाल चौधरी इटहरी उपमहानगरपालिकाका मेयर हुन् । तीन जना अध्यक्ष पदमा आकांक्षी रहेतापनि पोखरेलको सभ्भावना बढी रहेको छ । नेकपा एमाले नेता तथा कार्यकर्ताहरुले सर्वसम्मतबाट नेतृत्व चयन हुने बताएपनि तीन जना अध्यक्ष पदका आकांक्षीहरुले पछि नहटने समेत श्रोतको दाबी छ ।
त्यसैगरी राष्ट्रिय युवा संघ नेपालका केन्द्रीय सचिव देवानन्द मेहताले नेकपा एमाले जिल्ला सुनसरीको सचिव पदमा दावी गरेका छन् । पार्टीको गतिविधिमा र कार्यकर्तामाझ लोकप्रिय बनेका युवा नेता मेहताले सचिव पदका आकांक्षी भएको बताए । नेकपा एमाले सुनसरीको सचिव पदमा सर्वसम्मतबाट चयन हुने पक्का पक्की भएपनि अधिवेशनले टुंगो लगाउने उनले बताए । पार्टीको अधिवेशनबाट युवालाई अवसर दिने र सुनसरीको दक्षिणी सीमावर्ती ग्रामिण क्षेत्रका नेता तथा कार्यकर्ताहरुलाई बढी प्राथमिकता दिनुपर्ने उनको तर्क छ ।
त्यसैगरी उपाध्यक्षमा निलम खनाल,नन्द बस्नेत,लिलाम बस्नेत, रामप्रसाद मेहता, बालेश्वर चौधरी लगायत नेताहरुको दावी रहेका छन् । उपसचिवमा राम कोइराला,लोकेश निरौला, पदम लिम्बू, रवि खनाल,लहरुमाया जिमी, अन्जु पाण्डे लगायतका नेताहरुको समेत दावी गरेका छन् ।
नेकपा एमाले सुनसरीको ७ औं जिल्ला अधिवेशनबाट सर्वसम्मतबाट नेतृत्व चयन गर्ने नेता तथा कार्यकर्ताहरु बताउँछन् । नेकपा एमाले सुनसरीले एकताबाट नेतृत्व चयन गर्ने र ऐतिहासिक इनरुवा नगरपालिकामा हुन गइरहेको जिल्ला अधिवेशनलाई भब्य र सब्य तरिकाले सम्पन्न गराउने नेताहरुको भनाई छ ।
