टोमराज मेहता
इनरुवा । नेपाल कम्युनिष्ट पार्टी एमाले सुनसरीको सातौ अधिवेशनबाट नयाँ नेतृत्व चयन गर्नका लागि १ सय ७३ मतगणना गरेर बुधवार राती स्थगित गरेको छ ।
नेकपा एमाले सुनसरीको मंगलवार भएको निर्वाचन सम्पन्न भएपछि बुधवार बेलुकाबाट नेकपा एमाले पार्टी कार्यालय इनरुवा सुनसरीमा १ सय ७३ मतगणना गरेर स्थगित गरेको हो । १ सय ७३ मतगणना हुदाँ अध्यक्ष पदमा रेवती रमण भण्डारी ८७ मत ल्याएर अग्रता लिएका छन् भने खेमराज पोखरेल ७६ मत प्राप्त गरेका छन् । त्यसैगरी अध्यक्ष पदका उम्मेदवार द्धारिकलाल चौधरीले १० मत प्राप्त गरेका छन् ।
अध्यक्ष पदमा भण्डारी र पोखरेलबीच कडा प्रतिस्पर्धा हुने भनिएपनि भण्डारी पहिलो दिनको मतगणनामा ११ मतले अग्रता कायम गरेका हुन् । बुधवार साढे सातबजेसम्म मतगणना गरेर स्थगित गरेको र बिहीवार बिहान साढे १० बजेदेखी पुनः मतगणना जारी हुने नेकपा एमाले निर्वाचन समिति सुनसरीले जनाएको छ । त्यसैगरि उपाध्यक्ष पदमा दुई जनाको सिटमा सातजनाको उम्मेदवारी परेको थियो । उपाध्यक्ष पदमा निलम खनाल १०२ मत प्राप्त गरेर अग्रता कायम गरेका छन् भने नन्द बस्नते ६५ मत प्राप्त गरेका हुन् ।
खनालले ३७ मतले अग्रता कायम गरेको हो । उपाध्यक्ष पदमा एक जना निर्वाचित हुनेछ । खनालको जित सुनिश्चित हुने नेकपाका नेता तथा कार्यकर्ताहरु बताउँछन् । त्यस्तै नेकपा एमाले जिल्ला उपसचिव पदमा दुई जनाको सिटमा ७ जनाको उम्मेदवारबीच कडा प्रतिस्पर्धा हुने भएको छ । १ सय ७३ मतगणना हुँदा उपसचिव पदमा राम कोइराला ८९ मत प्राप्त गरेर अग्रता कायम गरेका छन् भने अञ्जनी पोखरेलले ५३ र योग्यराज खड्काले पनि ५३ मत प्राप्त गरि बराबर भएका छन् ।
उपसचिव पदमा लोकेश निरौलाले ५२ मत प्राप्त गरि तेस्रो स्थान ओगटन सफल भएका छन् । त्यस्तै सोही पदमा अर्जुन गहतराजले २८ मत, पदम लिम्बूले ३६ मत र लहरुमाया जिमीले १६ मत प्राप्त गरेका हुन् ।
नेकपा एमाले सुनसरीको मंगलवार सम्पन्न भएको निर्वाचनमा २ हजार १ सय ५० मतदातामा १ हजार ८ सय ५ जनाले मतदान गरेका थिए । बुधवार सुरु भएको जिल्लाका पदाधिकारीहरुको मतगणना सकिएपछि सदस्यहरुको मतगणना सुरु हुने निर्वाचन समितिले जनाएको छ ।
