इनरुवा । सुनसरीको बर्जु गाउँपालिका–६ स्थित बर्जु तालमा तेस्रो बर्जु महोत्सवमा मंगलवार भएको आगजनी र तोडफोड भएको घटनालाई तथ्य र सत्य छानविन गर्न जिल्ला प्रशासन कार्यालय सुनसरीको सहायक प्रमुख जिल्ला अधिकारी आनन्द पौडेलको संयोजकत्वमा पाँच सदस्यीय समिति गठन भएको छ ।
सहायक प्रमुख जिल्ला अधिकारी पौडेल संयोजकत्वमा गठन भएको छानविन समितिमा जिल्ला प्रहरी कार्यालय सुनसरीका डिएसपी नरेन्द्र कुमार कार्की, सशस्त्र प्रहरी बल ४ नम्बर गणका डिएसपी मित्रलाल श्रेष्ठ, राष्ट्रिय अनुसन्धान जिल्ला कार्यालयका अनुसन्धान अधिकृत किरण भट्टराई र बर्जु गाउँपालिकाका प्रमुख प्रशासकीय अधिकृत प्रमोद चौधरी सदस्य रहेका छन ।
सुनसरीका प्रमुख जिल्ला अधिकारी इन्द्रदेव यादवले गठित समितिलाई महोत्सवको क्रममा भएको आगजनी र तोडफोड सम्वन्धमा अध्ययन तथा अनुसन्धान गरी ५ दिन भित्र प्रतिवेदन बुझाउन आग्रह गरेका छन् ।
जिल्ला प्रशासन कार्यालय सुनसरीको आयोजित पत्रकार सम्मेलनलाई सम्वोधन गर्दै प्रजिअ यादवले बर्जु महोत्सवको दोषी बर्जु गाउँपालिकाका अध्यक्ष रघुनन्दन चौधरी रहेको बताए ।
पाँच सदस्यीय छानविन समितिले पाँच दिन पछि बुझाउने प्रतिवेदनबाट सार्वजनिक हुने र दोषी ठहरिए कानुन बमोजिम कार्वाही हुने समेत उनले बताए ।
बर्जु महोत्सव घटनाको मुख्य दोषी को त ? भन्ने प्रश्नमा वहाँले जवाफ दिदै स्थानीय सरकारका प्रमुख दोषी भएको बताए । जिल्ला प्रशासन कार्यालय सुनसरीले पटक पटक महोत्सव स्थगित गर्न अनुरोध गरेपनि वहाँले अटेर गर्दै महोत्सव संचालन गरेको उनको भनाई थियो ।
महोत्सवमा आगजनी र तोडफोडको बिषयलाई अनुसन्धान गर्नका लागि पाँच सदस्यीय छानविन समिति गठनले निचोड निकाल्ने समेत उनले बताए । आयोजकको बेवास्ता र अटेरले गर्दा आक्रोसित दर्शकहरुले आगजनी र तोडफोड गरेको उनले जिकिर गरे ।
जिल्ला प्रशासन कार्यालय सुनसरीद्वारा जारी गरिएको प्रेस विज्ञप्ति जस्ताको त्यस्तै ।
