इनरुवा । प्रदेश १ राष्ट्रियसभा निर्वाचनको खुल्ला तर्फ गोपाल बस्नेत विजयी भएका छन् । गठबन्धनका काँग्रेसका बस्नेत विजयी भएका हुन् । यसअघि खुल्लातर्फमा एमालेका उम्मेदवार गुरु बराल र बस्नेतको बराबरी मत आएको थियो ।
गठबन्धनका बस्नेत र एमालेका बरालको बराबरी मत ४ हजार ४ सय ८८ मत आएको थियो । बराबरी मत आएपछि भएको गोला प्रथाबाट निर्वाचन नतिजा निक्र्यौल गरिएको हो ।
राष्ट्रियसभा सदस्य पदका लागि बुधवार भएको निर्वाचनमा प्रदेश–१ बाट गठबन्धनका २ र एमालेका एक जना उम्मेदवार निर्वाचित भएका छन् । प्रदेश–१ गठबन्धनबाट गोपालकुमार बस्नेत र जयन्ती राई निर्वाचित भएका छन् ।
यस्तै नेकपा एमालेका सोनाम ग्याल्जेन शेर्पा निर्वाचित भएको छ । यस्तै गठबन्धतर्फकी जयन्ती राईले ४ हजार ६ सय ९२ मत प्राप्त गर्दै विजयी भएका हुन् । उनको निकटतम प्रतिद्वन्द्वी सुमित्रा भण्डारीले ४ हजार ३ सय ६२ मत प्राप्त गरेका हुन् ।
यस्तै नेकपा एमालेका सोनाम ग्याल्जेन शेर्पा ४ हजार ७ सय ५२ मतसहित निर्वाचित भएका हुन् । उनको निकटतम प्रतिद्वन्द्वी हेमराज राईले ४ हजार ३ सय ६८ मत भार प्राप्त गरेका हुन् । प्रदेश–१ को पाँच दलिय गठवन्धनबाट जनता समाजवादी पार्टीको तर्फबाट राई राष्ट्रिय सभा सदस्य पदमा पराजित भएपछि गठवन्धनभित्र अन्तरघात भएको चर्चा सुरु भएको छ ।
बुधवार बिहान ९ बजेदेखि ३ बजेसम्म भएको निर्वाचनमा स्थानिय तहका २ सय ७२ मध्ये २ सय ७० र ९२ जना प्रदेशसभा सदस्यमध्ये ९१ जनाले मतदान गरेका थिए । राष्ट्रियसभा निर्वाचनका लागि प्रदेश १ मा स्थानीय तहका प्रमुुख, उप–प्रमुख र प्रदेशसभाका सदस्य गरी कुल ३ सय ६४ मतदाता छन् । प्रदेश १ मा विराटनगरस्थित प्रदेश निर्वाचन कार्यालय र बाली संरक्षण प्रयोगशालाको कार्यालयको प्राङ्गणमा मतदान भएको थियो ।
