इनरुवा । सुनसरीको इनरुवा नगरपालिका–५ की एकल महिलालाई दुई कोठे घर निर्माण कार्यको शनिवार शिलान्यास गरिएको छ । सार्थक प्रयास इनरुवाको सहकार्यमा इनरुवा–५ की एकल महिला सुभद्रा पौडेललाई दुई कोठे घर निर्माण कार्यको शनिवार शिलान्यास गरिएको हो । इनरुवा नगरपालिकामा तीन जना एकल महिलालाई दुई कोठे घर निर्माण कार्यको इनरुवा–५ बलाहाबाट शुभारम्भ गरिएको छ ।
त्यसैगरि इनरुवा–१ पूर्व टोलकी सरिता सुवेदी र इनरुवा–९ बवियाकी रोशन खातुन गरि तीन जना एकल महिलालाई दुई कोठे घर निर्माण कार्य सुरु गरेको छ । इनरुवा–५ की एकल महिला पौडेलले आप्mनो घर आफैले शिलान्यास गरेको सार्थक प्रयास इनरुवाले जनाएको छ ।
कोभिड–१९ को दोस्रो लहरमा इनरुवाका देश विदेशमा रहेका व्यक्तिहरुले कम्तिमा एक महिनासम्म दुई छाक टार्न सक्ने गरि राहत वितरण गरेका थिए । इनरुवा लगायत विश्वमा त्रसित र लकडाउन मार्फत ठप्प परेको बेला गरिब तथा विपन्न परिवारलाई इनरुवाका ६ सय ५ घरपरिवारलाई राहत उपलब्ध गराएको थियो । देश विदेशमा रहेका इनरुवाबासी दाताहरुको आर्थिक सहयोगबाट सो राहत प्याकेज उपलब्ध गराएको थियो ।
सोहि राहत वितरण कार्यक्रममा खर्च भएर बाँकी रहेको ७ लाख २१ हजार ५ सय ९२ रुपैयाँबाट एकल महिला तथा गरिब विपन्न परिवारलाई दुई कोठे घर बनाउन सुरु गरेको सार्थक प्रयास इनरुवाका उत्तम चाम्लिङ्ग राईले जनाएको छ ।
सार्थक प्रयासको सहकार्य र व्यवस्थापनमा दाताहरुकै सल्लाह सुझाव अनुसार गरिब एकल महिला, आर्थिक अवस्था दयनीय भएको र घरको अवस्था पनि जिर्ण रहेको र असहायहरुको पहिचान गरि तीन जनाको नाम छनौट गरि उनीहरुलाई दुई कोठाको घर बनाइदिने योजना अनुरुप कार्य अगाडी बढाएको उनले बताए । सार्थक प्रयास इनरुवाले गरिब तथा विपन्न परिवारका बालबालिकाहरुलाई जाडोयामको मौसममा न्यानो कपडा समेत वितरण गरेका थिए ।
