इनरुवा । नेपाल विधार्थी संघ कोशी गाउँपालिका कार्य समितिको आयोजनामा एक दिने कोरोना सम्वन्धि अन्तरक्रिया कार्यक्रम आइतवार सम्पन्न भएको छ ।
नेपाली कांग्रेस सुनसरी क्षेत्र नम्बर–४ को पार्टी कार्यालय लौकहीमा सुरक्षाकर्मीहरुसँग एक दिने अन्तरक्रिया कार्यक्रम सम्पन्न भएको हो ।
कोशी गाउँपालिकासँग जोडिएको भारतीय सीमावर्ती क्षेत्रहरुमा कोभिड १९ को तेस्रो चरणको लहरमा सावधानी अपनाउनका लागि सुरक्षाकर्मीहरुको भुमिका तथा नेविसंघले निर्वाह गर्नुपर्ने भुमिका विषयकमा छलफल भएको थियो ।
नेपाल विधार्थी संघ कोशी गाउँपालिका कार्य समितिले भारतीय सीमा क्षेत्रमा सर्वसाधारणहरुलाई निःशुल्क मास्क वितरण गर्ने, वडा–वडामा नेविसंघ परिचालन गरी खोप लगाउन सर्वसाधारणहरुलाई अनुरोध गर्ने र घरेलु मदिरा विक्री वितरण गर्न रोक लगाउने लगायतका विषयमा अन्तरक्रिया कार्यक्रमले निचोड निकालेको थियो ।
नेपाल विधार्थी संघ कोशीले खोप अभियानलाई प्रभावकारी बनाउन प्रत्येक वडामा पुगेर जनचेतना फैलाउने र खोपबाट कोही नछुटुन भन्ने उद्देश्यका साथ अभियानलाई तिव्रताका साथ अगाडी बढाउने बताइएको छ । भारतीय सीमा क्षेत्रका सशस्त्र प्रहरीसँग समन्वय र सहकार्य गरी आवत जावत गर्ने सर्वसाधारणहरुलाई निःशुल्क मास्क वितरण गर्ने कोरोना सम्वन्धी जनचेतना फैलाउनका लागि नेविसंघ कोशी अग्रसर भएको हो ।
नेपाल विधार्थी संघ कोशीका सभापति कुन्दन मण्डलको सभापतित्वमा सम्पन्न भएको सो कार्यक्रमको प्रमुख अतिथि नेपाली कांग्रेस सुनसरी क्षेत्र नम्बर–४ का सभापति तथा कोशी गाउँपालिकाका अध्यक्ष ऐयुव अन्सारी, कोशीका सशस्त्र प्रहरी, जनपथ प्रहरी र नेविसंघका पदाधिकारीहरु लगायतको सहभागिता रहेको थियो ।
