सुनसरी । झापा जिल्लाको कचनकवल गाउँपालीका ४ स्थित खुट्टामुनीमा निर्माण गरिएको सशस्त्र प्रहरी बल नेपाल बिओपी केचनाको उद्घाटन गरिएको छ ।
स्थानीय समाजसेवी रघुनन्दन गणेश र उनकी पत्नी प्रतिमाकुमारी गणेशले निशुल्क दिएको ९ कठ्ठा ६ धुर जग्गामा १ करोड ४२ लाख एकहजार २३९ रुपैयाँलागतमा निर्माण गरिएको नवनिर्मित बिओपी केचना झापाको भवनको १ नम्बर प्रदेशका मुख्यमन्त्री राजेन्द्रकुमार राईले उद्घाटन गरेका हुन । प्रदेश नम्बर १ आन्तरिक मामिला तथा कानुन मन्त्रालयको सहयोगमा उक्त बिओपी स्थापना गरिएको हो ।
बिओपी उद्घाटन कार्यक्रमलाई सम्बोधन गर्दै मुख्यमन्त्री राईले विषम परिस्थितिमा मुलुक र जनताको शान्ति सुरक्षामा सशस्त्र प्रहरीले अहम् भूमिका खेलेको बताउदै सीमावर्ती क्षेत्रमा शान्ति सुरक्षा थप मजबुत बनाईराख्न स्थापना गरिएको नयाँ बिओपी महत्त्वपूर्ण सावित हुने बताए ।
शान्ति सुरक्षा कायम राख्दै सीमा सुरक्षा र कोभिड नियन्त्रणमा सशस्त्र प्रहरीको उल्लेखनीय योगदान रहेको भन्दै उनले सशस्त्र प्रहरीको प्रशंसासमेत गरे । सोही कार्यक्रममा बोल्दै कार्यक्रमका विशिष्ट अतिथि आन्तरिक मामिला तथा कानुन मन्त्री केदार कार्कीले सीमा सुरक्षामा वर्तमान प्रदेश सरकार कटिबद्ध भएर लागेको दाबी गरे ।
सीमा सुरक्षामा सुरक्षाकर्मीसँगै नागरिकको समेत दायित्व उत्तिकै महत्त्वपूर्ण भएको बताउदै उनले भने मुलुकको एक इंच जग्गा पनि तलमाथि हुन नदिन प्रदेश सरकार संवेदनशील भएर लागेको छ । प्रदेश नम्बर १ सरकारको आन्तरिक मामिला तथा कानुन मन्त्रालयबाट आर्थिक वर्ष २०७६÷०७७ मा विनियोजित १ करोड ४२ लाख एकहजार दुईसय ३९ रुपैयाँ लागतमा बिओपी केचना झापाको भवन निर्माणकार्य धरानको श्री स्वामी नारायण निर्माण सेवा प्रालि गरेको हो ।
उक्त कार्यक्रममा बिओपी स्थापन गर्न निशुल्क जग्गा उपलब्ध गराउने रघुनन्दन गणेश र उनकी पत्नी प्रतिमाकुमारी गणेशलाई मुख्यमन्त्री राई,मन्त्री कार्की र प्रदेश नम्बर १ सशस्त्र प्रहरी बल बाहिनीका प्रमुख डिआइजी कमल गिरीले संयुक्तरूपमा दोसल्ला ओढाएर सम्मान गरेका थिए ।
सशस्त्र प्रहरीको बिओपी स्थापना गर्न सहयोग गर्ने जग्गादाता,स्थानीय जनप्रतिनिधि,समाजसेवीलगायतलाई धन्यवाद ज्ञापनपत्र गर्दै डिआइजी गिरीले सशस्त्र प्रहरी बल सीमामा सुरक्षासँगै अपाराधिक गतिविधि र चोरीपैठारी नियन्त्रण गर्दै शान्ति सुरक्षा कायम गर्न अहोरात्र खटिदै आएको दाबी गरे ।
कार्यक्रममा प्रदेश नम्बर १ का मुख्य सचिव डाक्टर रामप्रसाद घिमिरे, कचनकवल गाउँपालीकाका अध्यक्ष अन्जार आलम, झापाका प्रमुख जिल्ला अधिकारी छविलाल रिजाल, एसएसपी विश्वकुमार भट्टराई, नेपाली सेना नयाँ श्रीनाथ गणका गणपति प्रमुख सेनानी अमरजंग थापा, नम्बर २ गण हेक्वा झापाका एसपी विश्वमणि पोखरेल, नम्बर ३८ रिजर्भ गण हेक्वा झापाका गणपति एसपी सुभाष भट्टराई,पत्रकार महासंघ झापाका अध्यक्ष एकराज गिरीलगायतको उपस्थिति रहेको थियो ।
