इनरुवा । इनरुवा अस्पताल सुधार संघर्ष समिति सुनसरीद्वारा अस्पतालको प्राङ्गणमा पार्क निर्माण गर्ने अभियान सुरु गरेको छ ।
संघर्ष समितिको आइतवार बसेको बैठकले निर्माण तथा सहयोग संकलन समितिको संयोजकमा दयानन्द साहको संयोजकत्वमा सात सदस्यीय समिति गठन गरेको हो ।
समितिको सदस्यहरुमा राजकुमार मेहता, अरुण पोदार,बिमला मेहता, अजय साह,संजिब दत्त र राम चन्द्र मेहता रहेका छन् । सो बैठकले इनरुवा अस्पतालको ९ लाख रुपैयाँ बिकास समितिको एक सदस्यले हिनामिना र अनियमितता गरेको पाइएकोले खोजी तलासी गरेर सदस्य विरुद्ध आन्दोलन गर्ने भएको छ ।
संघर्ष समितिका संयोजक दिलिप चन साहुले अस्पतालमा भएको भ्रष्टाचारको सम्बन्धमा अध्ययन गरी उनीहरु विरुद्ध जनतामाझ पर्दाफास गर्ने बताए ।
अस्तपालमा कर्मचारी भर्ना सम्बन्धमा , अस्पतालको अतिक्रमीत जग्गा सार्वजनिक गर्ने सम्बन्धमा, अस्पतालमा ब्लड बैंक, आइसियु भेन्टिलेटर, सिटी स्यकान संचालन सम्बन्धमा, फार्मेसीमा औषधी उपलब्ध हुनुपर्ने लगायतको विषयहरुमा अस्पताल बिकास समितिको अध्यक्ष गोपाल राजभण्डारी, सुनसरीका प्रमुख जिल्ला अधिकारी इन्द्रदेव यादव र प्रदेश–१ को स्वास्थ्य मन्त्री जयराम यादवलाई ध्यानाकर्षण पत्र बुझाउने निर्णय भएको संघर्ष समितिको संयोजक साहुले जानकारी दिएका छन् ।
माघ २५ गते मंगलवार इनरुवा अस्पतालका मेसु डा.देवराज घिमिरेलाई सम्मान गर्ने समेत बैठकले निर्णय गरेको छ । अस्पतालको सुधार कार्यमा जुटेका डा. घिमिरेले रेफर कार्यलाई बन्द गरी उपचार गर्न थालेपछि चर्चाका पात्र बनेका छन् ।
सर्वसाधारणहरुलाई अहिले रेफर गर्ने कार्य बन्द गरेर उपचार गर्न सुरु गरेपछि पछिल्लो समय उपचार गराउने बिरामीको संख्या बढ्दै गएको पाइएको छ ।
