डुमरलाल मेहता
अमाहीबेल्हा । सुनसरीको बर्जु गाउँपालिकाको नव निर्मित प्रशासनिक भवनको सोमवार उद्घाटन गरिएको छ । बर्जु गाउँपालिका वडा नम्बर ५ अमाहीबेलाहा स्थित बर्जु गाउँपालिकाको सुविधासम्पन्न प्रशासनिक भवनको उद्घाटन गरिएको हो ।
भवनको सोमबार उद्घाटन गर्दै प्रदेश नं १ का प्रदेशसभा सदस्य तथा आन्तरिक मामिला तथा कानुन मन्त्री केदार कार्कीले अव आफ्नै भवन भएकाले बर्जुलाई काम गर्न सहज भएको बताए । उनले भौर्तिक पूर्वाधारले पनि गाउँबासीको सेवामा सहज, छिटो र सरल तरिकाले सेवा पाउने विश्वास व्यक्त गरें ।
“स्थानीय तहमा जनप्रतिनिधि आएपछि यहाँका गाउँवासीले विकासको अनुभूति गर्न पाएका छन्, अब भवनको अभाव छैन, संस्थागत विकास र कर्मचारीको क्षमता अभिवृद्धि गर्दै थप सहज र छिटोछरितो सेवाप्रवाह गर्न आग्रह गर्दछु”, उनले भने ।
प्रमुख जिल्ला अधिकारी इन्द्रदेव यादवले सेवाग्राहीको सेवा प्रवाहमा कुनै पनि कमी नगर्न कर्मचारीलाई आग्रह गर्दै गाउँ क्षेत्रको शान्तिसुरक्षा कायम राख्न स्थानीय प्रशासन प्रतिबद्ध रहेको बताए ।
निर्माण सम्पन्न एकतले पक्की भवनमा हल सहित ७ वटा कोठा रहेको बर्जु गाउँपालिकाका प्रमुख प्रशासकीय अधिकृत प्रमोद कुमार चौधरीले जानकारी दिए ।
प्रमुख प्रशासकीय अधिकृत चौधरीका अनुसार नव निर्मित भवन उत्तरा कन्ट्रक्सन एण्ड सप्लायर्स कटहरी मोरङले निर्माण गरेको हो । भवन उद्घाटन कार्यक्रममा गाउँपालिकाको लागि जग्गा उपलब्ध गराउने राधेश्याम चौधरी,रोमी शर्मा र बिनादेवी यादव लगायतलाई सम्मान गरिएको चौधरीले बताए ।
दुई तले भवन निर्माणको योजना रहेपनि तत्कालकोलागि एक तले संरचना निर्माण गरिएको गाउँपालिकाले जनाएको छ । भवन उद्घाटन सँगै कामकाजको तयारी थालिएकाले सेवा प्रवाह सहज र सरल हुने अध्यक्ष रघुनन्दन चौधरीले बताए ।
अध्यक्ष चौधरीले यसअघि पुरानो र साँघुरो भवनका कोठाबाट सेवा प्रवाह हुँदै आएकोमा नयाँ भवनबाट दिइने सेवाले सर्वसाधारणमा थप सहजता हुने बताए ।
यसैबिच भवनसँगै बर्जु गाउँपालिकाको कार्यालयले ९ औं गाउँसभाको समेत उद्घाटन गरेको छ । प्रशासकीय अधिकृत प्रमोद कुमार चौधरीले गाउँसभा दुई दिन चल्ने बताए । अधिकृत चौधरीले गाउँसभामा विगतको समिक्षा र पालिका भित्र आउँदा दिनमा संचालनमा ल्याइने योजना तथा कार्यक्रमका सम्वन्धमा नीति निर्माण गरिने बताए ।
गाउँसभा तथा नव निर्मित भवन उद्घाटन पूर्व गाउँपालिका हातामा रक्तदान कार्यक्रमको आयोजना गरिएको थियो । लायन्स क्लब अफ हेल्थ प्रोफेसनल बिराटनगरले आयोजना गरेको कार्यक्रममा ३३ जनाले रक्तादान गरेका थिए । क्लबका अध्यक्ष समेत रहेका बर्जुको प्रमुख प्रशासकीय अधिकृत चौधरीको पहलमा गाउँपालिकामा रक्तदान कार्यक्रमको आयोजना गरिएको थियो ।
