इनरुवा । सुनसरीको भोक्राहा नरसिंह गाउँपालिकामा अधिवेशन स्थगित भएपछि नेपाली कांग्रेसका नेताहरुले सहमतिमा नेतृत्व चयन गर्न जोड दिएका छन् । नेपाली कांग्रेस भोक्राहा नरसिंह वडा कार्यालय उद्घाटन कार्यक्रमलाई सम्वोधन गर्दै कांग्रेसका नेताहरुले सहमतिमा नेतृत्व चयन गर्नुपर्नेमा जोड दिएका हुन् ।
नेपाली कांग्रेस भोक्राहा नरसिंह वडा नम्बर ३,५,६ र ८ मा वडा कार्यालय शनिवार एक साथ उद्घाटन भएको छ । नेपाली कांग्रेस सुनसरी क्षेत्र नम्बर–४ का क्षेत्रीय सभापति तथा कोसी गाउँपालिकाका अध्यक्ष ऐयुव अन्सारीले ३,५,६ र ८ नम्बर वडा कार्यालय उद्घाटन गरेका हुन् । यस अघि नै ७ नम्बरको वडा कार्यालय उद्घाटन कार्यक्रम सम्पन्न भइसकेको थियो । नेपाली कांग्रेस भोक्राहा नरसिंह वडा नम्बर १,२ र ४ को वडा कार्यालय खोल्न बाँकी रहेको छ ।
उद्घाटन कार्यक्रमका प्रमुख अतिथि समेत रहेका क्षेत्रीय सभापति अन्सारीले भोक्राहा नरसिंहको पालिका स्तरीय अधिवेशन सहमतिमा गर्न एक जुट हुनुपर्ने बताएका छन् । भोक्राहा नरसिंह गाउँपालिकामा कांग्रेसका नेताहरुले पहल र प्रयास गर्नुपर्नेमा जोड दिए । पालिका स्तरीय अधिवेशन हुन नसकेकाले एक ठाउँमा उभिएर फागुन १० गतेभित्र सहमतिमा नेतृत्व चयन गरेर स्थानीय तहको निर्वाचनमा होमिन नेता तथा कार्यकर्ताहरुले अनुरोध गरेका छन् ।
कांग्रेसको संगठनलाई बलियो बनाउनका लागि कांग्रेसको १४ औं महाधिवेशनका सबै तिता मिठा कुरा बिर्सेर स्थानीय तहको निर्वाचनमा होमिन तयार हुनुपर्नेमा उनले जोड दिएका दिए । भोक्राहा नरसिंह गाउँपालिकाको अधिवेशन निर्वाचन नगरी सहमतिबाट नेतृत्व चयन गर्न पार्टीले निर्देशन गरेको हुनाले कार्यान्वयन गर्न सबै एकजुट हुनुपर्ने उनले बताए ।
नेपाली कांग्रेस भोक्राहा नरसिंह वडा नम्बर–६ को वडा कार्यालय उद्घाटन कार्यक्रमलाई सम्वोधन गर्दै कार्यक्रमका विशिष्ट अतिथि पुर्व सांसद सुर्यदेव दास उराँवले पालिकाको अधिवेशन सहमतिको विकल्प नरहेकोले एकजुट भएर नेतृत्व चयन गर्नुपर्ने बताए । कांग्रेसको १४ औं महाधिवेशनमा भएको गुट–उपगुटलाई बिर्सेर कांग्रेसलाई बलियो बनाउनेतर्फ सबै लाग्नुपर्ने उनले बताए ।
त्यसैगरी नेपाल मुस्लिम संघ १ नम्बर प्रदेशका सभापति ईसराईल मंसुरीले पालिकाको अधिवेशन सहमतिबाट नेतृत्व चयन हुने ठोकुवा गरे । वडा कार्यालयको उद्घाटन कार्यक्रमका विशिष्ट अतिथि समेत रहेका सभापति मंसुरीले पालिकाको अधिवेशन चुनावबाट गर्नुपर्ने बाध्यता हटेर गएको र सहमतिमा नै हुने भएकाले तेरो मेरो नगरीकन एक ठाउँमा बसेर सहमति, सहकार्य र एकताबाट नेतृत्व चयन हुने विश्वस्त रहेको बताए । भोक्राहा नरसिंह वडा नम्बर–६ को वडा कार्यालयको उद्घाटनबाट एकताको सन्देश प्रवाह भएको समेत उनले जिकिर गरे ।
त्यसैगरी नेपाल मुस्लिम संघ सुनसरीका सभापति अजमल अख्तर आजादले मनमुटावलाई अन्त्य गरी कांग्रेसलाई पालिकामा जिताउन आवश्यक रहेको एकजुट हुनुपर्ने बताए । आगामी बैशाख ३० गते हुने स्थानीय तहको निर्वाचनमा भोक्राहा नरसिंह गाउँपालिकामा अध्यक्ष पदमा जोसुकैले टिकट पाएपनि सबैले सहयोग गरी जिताउनुपर्नेमा उनले जोड दिए ।
भोक्राहा नरसिंहमा अघिल्लो स्थानीय तहको निर्वाचनमा कांग्रेसका उम्मेदवार पराजित भएकाले कसैले खुट्टा नतानी तन,मन र धनले कांग्रेसका उम्मेदवारलाई बिजयी बनाउनुपर्नेमा जोड दिए । पालिकाको नेतृत्व चयन गर्नका लागि नेताहरुले कसरत गरेपछि सहमतिमा नै टुंगो लाग्ने र आफुले पनि सहयोग गर्ने प्रतिवद्धता उनले व्यक्त गरे । कार्यक्रममा नेपाली कांग्रेसका नेताहरु रुकमण खत्री,हारुन अन्सारी,शत्रुघन यादव, वीरेन्द्र उराँव, ममता उराँव, हाजी सुलेमान मंसुरी लगायतकाले सहमतिमा पालिका स्तरीय सहमतिमा नै नेतृत्व चयन गर्न जोड दिएका दिए ।
नेपाली कांग्रेस भोक्राहा नरसिंह–३ का वडा सभापति देवकुमार मण्डल, ५ नम्बरका वडा सभापति हारुण रसिद मंसुरी, ६ नम्बरका वडा सभापति जमालुद्धिन मंसुरी, ८ नम्बरका वडा सभापति कलिम मंसुरीको सभापतित्वमा वडा कार्यालय उद्घाटन भएका हुन् । नेपाली कांग्रेस सुनसरी क्षेत्र नम्बर–४ का सचिव जुगेश्वर यादव र पुर्व सचिव राजेन्द्र प्रसाद मेहताले कार्यक्रम संचालन गरेका थिए ।
