टोमराज मेहता
इनरुवा । इनरुवा नगरपालिकाका नगर प्रमुख राजन मेहताले केही व्यक्तिहरुले आफ्नो व्यक्तिगत स्वार्थ पुरा गर्नका लागि फेसबुके मेयर बनाउँदै हिडेकोमा आफुले खुट्टा नकमाउने बताएका छन् ।मधेशा युवा टिमले आयोजना गरेको निःशुल्क स्वास्थ्य विमा कार्यक्रमलाई सम्वोधन गर्दै नगर प्रमुख मेहताले यस्तो बताएका हुन् ।
मधेशा युवा टिमले मधेशाका एक सय अति विपन्न परिवारलाई निःशुल्क स्वास्थ्य विमा कार्ड वितरण गर्ने कार्यक्रममा सम्वोधन गर्दै नगर प्रमुख मेहताले फेसबुके मेयर बनाउँदैमा आफु नडराउने बताउँदै आफ्नो उम्मेदवारी रहने दावी गरेका छन् । सरकारले आउँदो बैशाख ३० गते स्थानीय तहको निर्वाचनको मिति घोषण गरेको हुदाँ इनरुवा नगरपालिकाको मेयर पदमा पुनः उम्मेदवारी रहने उनले घोषणा गरेका हुन् ।
उनले भने, ‘ मेरो उम्मेदवारी पुनः मेयर पदमा रहन्छ । इनरुवा नगरपालिकाको कार्यपालिका बैठकमा पाँच वर्षे कार्यकाल वित्दै गर्दा ‘नोट अफ डिसेन्ट’ कसैले लेखेन् । नगरपालिकामा आफु फुटवल टिमको क्याप्टेन भएर भुमिका निर्वाह गरेको छु । कार्यपालिकामा बहुमत नहुदाँ हुदैँ पनि सबैलाई मिलाएर अहिले सम्म आएको छु । कसैले विरोध गरेको छैन । त्यसैले आउँदो निर्वाचनमा मेयर पदमा मेरो पुनः उम्मेदवारी रहनेछ । लोकतन्त्रमा जनताले विरोध गर्नु स्वभाविक हो, जनताले घचघचाउनु सुन्दर पक्ष हो ।’
मधेशा युवा टिमले लागत संकलन गरेर इनरुवा–६ का एक सय अति विपन्न परिवारलाई निःशुल्क स्वास्थ्य विमा कार्ड हस्तान्तरण गरेको छ । मधेशा युवा टिमका अध्यक्ष उत्तम कार्की लगायतको सहकार्यमा मधेशामा एक सय घरपरिवारलाई निःशुल्क स्वास्थ्य विमा गरिएको हो ।
त्यसैगरी नेपाली कांग्रेस सुनसरीका सभापति केदार भण्डारीले ठाडो नाँच देखाउने र भ्रष्टाचारीलाई आउँदो स्थानीय तहको निर्वाचनमा टिकट नदिने बताएका छन् । नेपाली कांग्रेस इनरुवा–५ को टोल समिति गठन कार्यक्रमलाई सम्वोधन गर्दै सभापति भण्डारीले यस्तो बताएका हुन् ।
सुनसरी कांग्रेसका सभापति भण्डारीले गफ मात्रै ठुला ठुला गर्ने र चुनाव जित्छु भन्नेलाई नेपाली कांग्रेसले टिकट नदिने बताए । कार्यक्रमलाई सम्वोधन गर्दै सभापति भण्डारीले जनताले कामको मुल्याङ्कन गरेर वाह वाह गरेको अवस्थामा टिकट कसैले रोकेर पनि रोकिनेछैन ।
उनले भने, ‘कसैले डंका बजाएर म यो काम गरेको छु, त्यो काम गरेको छु भनेर आफैलाई मपाईको भरमा पार्टीले मुल्यांकन गर्दैन् । दुराचारी, भ्रष्टाचारी र व्यभिचारीलाई नेपाली कांग्रेसले एक,दुई, तीन टिकट दिदैन् । असल काम गर्ने, जनताको बीचमा असल छवि बनाउनेले डराउनु पर्दैन् । कांग्रेस भनेको जनताको लागि काम गर्ने पार्टी हो । व्यक्ति ठुलो हुँदैँन संस्था ठुलो हुन्छ । राम्रो काम गर्ने व्यक्तिले अवसर पाउँछ, त्यसका लागि एकजुट हुनुपर्नेछ ।’
