इनरुवा । नेपाली कांग्रेस इनरुवा वडा नम्बर–३ कार्य समितिले केही दिनयता टोल समिति विस्तारमा व्यस्त बनेको वडा सभापति सुनोज निरौलाले बताएका छन् ।
स्थानीय तहको निर्वाचन मिति घोषणा अघि देखी नै टोल कार्य समिति विस्तारमा लागि परेका निरौलाले नेपाली कांग्रेसको विद्यान अनुसार नै टोल कार्य समिति गठन गर्ने कार्यलाई तिब्रता दिएको बताएका हुन् ।
नेपाली कांग्रेसको १४ औं अधिवेशनबाट पुनः इनरुवा–३ को वडा सभापतिको जिम्मेवारी पाएपछि निरौलाले टोलदेखी वडासम्म कांग्रेसलाई सशक्त बनाउने उद्देश्यले तल्लो तहदेखी नै नेता तथा कार्यकर्तालाई जिम्मेवारी दिई मजबुत बनाउन थालेका हुन् ।
टोल कार्यसमिति गठन अभियानलाई निरन्तरता दिदै कांग्रेसमय बनाउन र आउँदो निर्वाचनमा नेपाली कांग्रेसलाई जिताउने अभियान रहेको वडा सभापति निरौलाले संचारकर्मीसँगको कुराकानीमा बताए ।
यस अघिको निर्वाचनमा नेकपा एमालेले वडा हात पारेकोले आउँदो निर्वाचनमा नेपाली कांग्रेसको जित सुनिश्चित गर्नका लागि कसरत सुरु गरेको निरौलाको कथन छ ।
नेपाली कांग्रेस इनरुवा नगरपालिका वडा नम्बर–३ मा यसै सतामात्रै १३ वटा टोल समिति गठन गरी विस्तार गर्नुको साथै संविधानका पिता सुशिल कोइराला स्मृति दिवसमा इनरुवा–३ को सखुवागाछीमा दीप प्रज्जवलन गर्नुको साथै चोकमा रहेको पुरानो तथा धुजा धुजा भएर च्यातिएको राष्ट्रिय झण्डा समेत परिर्वतन गरेको थियो ।
नेपाली कांग्रेस इनरुवा–३ वडा कार्य समितिको संयोजनमा माघ २९ गते साँझ महेन्द्रचौक क्षेत्रमा सरसफाई समेत गरेको छ । वडा सभापति निरौला लगायतको टिमले निरन्तर रुपमा टोल कार्य समिति गठनलाई अगाडी बढाउँदै लगिएको छ ।
इनरुवा–३ मा अझै लगभग ४० वटा टोल समिति गठन गर्न बाँकी रहेकोले यही महिनाभित्रै सम्पुर्ण टोल कार्य समिति गठन सम्पन्न गरी बृहत वडा भेला आयोजना गर्ने वडा सभापति निरौलाले जानकारी दिएका छन् ।
सरकारले स्थानीय तहको निर्वाचन मिति घोषणा गरेपछि संगठनलाई बलियो बनाउनका लागि कांग्रेसको विद्यान अनुसार टोल समिति गठन गर्ने कार्यलाई तिब्रता दिएको वडा सभापति निरौलाको भनाई छ ।
टोल समिति गठन गर्ने कार्यमा इनरुवा–३ बाट निर्वाचित भएका क्षेत्रीय प्रतिनिधि, नगर, क्षेत्र, प्रदेश र जिल्लाका पदाधिकारीहरुको समेत सक्रियतामा गठन गर्ने कार्य सुरु भएको हो । यसैगरी इनरुवा–५मा समेत मण्डल टोल समिति गठन गरेको छ ।
