लौकही । सुनसरीको कोशी गाउँपालीकामा सुकुम्बासी समस्या समाधान सम्बन्धमा अन्तरक्रिया कार्यक्रम सम्पन्न भएको छ ।
कोशी गाउँपालीकाका अध्यक्ष ऐयुब अन्सारीको अध्यक्षता तथा राष्ट्रिय भूमि आयोग सुनसरीका अध्यक्ष भगिरथ खत्वेको प्रमुख आतिथ्यमा आइतबार सुकुम्बासी तथा अव्यवस्थित बसोबासीको लगत सम्बन्धि अन्तरक्रिया कार्यक्रम सम्पन्न भएको हो ।
सोही अवसरमा बोल्दै प्रमुख अतिथि खत्वेले वडा वडाबाट इमानदारीपूर्वक वास्तविक पीडितहरुलाई छनोट गर्न सबैमा आग्रह गरे । वर्तमान जनप्रतिनिधिहरुले ठुलो अवसर पाएकाले अवसर सदुपयोग गर्न सकेको अवस्थामा जग्गा पाउने वास्तविक सुकुम्बासी,भूमिहीन र अव्यवस्थित बसोबास गर्ने सर्वसाधारणहरुले वर्षौंसम्म नबिर्सिने उनको भनाइ थियो ।
सुकुम्बासी समस्या समाधानका लागि आफू सक्रिय भएर लागेको बताउदै गाउँपालीकाका अध्यक्ष ऐयुब अन्सारीले कोशीमा कोही पनि दलित, सुकुम्बासी र विपन्नलाई समस्या नहुने गरी सबैलाई जग्गा र घर भएको गाउँबासी बनाउने उद्देश्यका साथ काम गरिरहेको बताए ।
नेपाल सरकारले गठन गरेको राष्ट्रिय भूमि आयोग र कोशी गाउँपालिकाबीच अघिल्लो आइतबार सुकुम्बासी समस्या समाधान गर्ने उद्देश्यले सम्झौता भएको थियो ।
भूमिहिन सुकुम्बासीहरुको समस्याप्रति कोशी गाउँपालीका गम्भीर भएको बताउदै अध्यक्ष अन्सारीले दीर्घकालीन समस्या समाधानमा सबै पक्षबाट साथ र सहयोग अपेक्षा गरेका छन् ।
उक्त कार्यक्रममा कोशी गाउँपालीकाका प्रमुख प्रशासकीय अधिकृत खगेन्द्र गिरी र आयोगका जिल्ला सचिव संजीव साहले सहजीकरण गरेका थिए भने कार्यक्रम कोशी गाउँपालीकाका आर्थिक प्रशासन तथा सामाजिक शाखा प्रमुख राजकिशोर मेहताले संचालन गरेका थिए । कार्यक्रममा कोशी गाउँपालीका क्षेत्रका प्रत्येक वडाका वडासचिवहरुलगायतको सहभागिता रहेको थियो ।
