इनरुवा । नेपाली कांग्रेस सुनसरी क्षेत्र नम्बर–४ का क्षेत्रीय सभापति ऐयुव अन्सारीले कांग्रेसको विद्यान अनुसार टोल टोलमा कार्य समिति गठन गर्नका लागि एकजुट भएर लाग्न नेता तथा कार्यकर्ताहरुलाई निर्देशन दिएका छन् ।
नेपाली कांग्रेस प्रतिनिधि सभा क्षेत्रीय कार्य समिति क्षेत्र नम्बर–४ सुनसरीको परिचयात्मक तथा आसन्न स्थानीय तहको निर्वाचन विषयक अन्तरक्रिया कार्यक्रमलाई सम्वोधन गर्दै क्षेत्रीय सभापति अन्सारीले प्रत्येक वडाको टोल–टोलमा पुगेर टोल समिति गठन गर्नुपर्ने बताए । नेपाली कांग्रेसको संशोधित विद्यान अनुसार टोल कार्य समिति गठन गर्नुपर्ने उल्लेख गरिएको हुनाले कांग्रेसलाई बलियो बनाउनका लागि टोल विस्तारमा लाग्नुपर्ने उनले बताए ।
नेपाली कांग्रेस सुनसरी क्षेत्र नम्बर–४ का क्षेत्रीय सभापति तथा कोसी गाउँपालिकाका अध्यक्ष अन्सारीले संगठन बनाउने अभिभारा वडा, पालिका, प्रदेश, क्षेत्र र जिल्लाका प्रतिनिधिहरुको काँधमा आएकाले तल्लो तह टोल भएकाले सुनसरी क्षेत्र नम्बर–४ को सबै वडाहरुको टोलमा कार्य समिति गठन गर्न लाग्नुपर्ने बताए । वडाका सभापतिहरु सक्रिय भएर टोल समितिलाई मजबुत बनाउनुपर्ने उनले बताए ।
टोल कार्य समिती निर्माण गर्न ढिलासुस्ती नगरी फागुन १० गतेभित्र सबै टोलमा समिति गठन गरी स्थानीय तहको निर्वाचनमा होमिनुपर्ने उनको तर्क थियो ।
स्थानीय तहको निर्वाचनमा जनताको चाहना र काम गर्ने निष्ठावान नेताहरुलाई वडामा टिकट दिनेछु, उनले भने,‘ त्यसका लागि जनताकाबीच जानुपर्ने र सबैले मिलेर संगठन निर्माणका लागि एकजुट हुनुपर्छ । संगठन निर्माण गर्ने सबैको दायित्व हो । टोल,वडालाई चुस्त र दुरुस्त बनाए मात्र संगठन बलियो हुन्छ । कांग्रेसको संगठन निर्माणमा पार्टीको अधिवेशनमा अटाउन नसकेकाहरुलाई पनि जोड्ने प्रयास गर्छु । ८० प्रतिशत हारेकोलाई समेटेर लग्नेछु ।’
नेपाली कांग्रेस पार्टीको संगठन सबैलाई आवश्यकता छ, त्यसैले सबैले मिलेर संगठन निर्माण गरौं र मजबुत बनाऔं उनले भने,‘ स्थानीय तहको निर्वाचनमा टिकटका लागि धेरै आंकाक्षीहरु हुन् सक्छ । टिकटको दौडमा धेरै हुन्छ, त्यसैले संगठन मजबुत भएमात्र कांग्रेस पार्टीले जित हासिल गर्न सक्छ । काम सहज गर्नका लागि सुनसरी क्षेत्र नम्बर–४ मा कार्य सम्पादन समिति समेत निर्माण गर्नेछु ।
सरकारले बैशाख ३० गते स्थानिय तहको निर्वाचन घोषणा गरेकोले कांग्रेसलाई जिताउने अभियान सुरु गर्ने र प्रत्येक वडाको टोल–टोलमा नेपाली कांग्रेसको झण्डा राख्ने अभियान सुरु गर्ने समेत क्षेत्रीय सभापति अन्सारीको भनाई छ ।
कार्यक्रममा नेपाली कांग्रेसलाई आउँदो निर्वाचनमा कसरी जिताउने रणनीति सहित वडाका सभापति, पालिकाका सभापति र प्रदेशका सभापति सहितका जिम्मेवार व्यक्तिहरुले आप्mना भनाई र कार्य प्रगतिहरु प्रस्तुत गरेका थिए ।
कार्यक्रममा इनरुवा नगरपालिकाका नगर प्रमुख राजन मेहता, प्रदेश(ख) का सभापति भिखारी मण्डल, नेपाली कांग्रेस प्रदेश–१ का सदस्यहरु जुलेखा खातुन र अम्बिका घिमिरे, बिनिता दाहाल, परमानन्द मेहता, सदानन्द मण्डल, अनु गुरुङ, , रेवतिरमण दुलाल,अजमल अख्तर आजाद, हारुन अन्सारी लगायतकाले बोलेका थिए । नेपाली कांग्रेस सुनसरी क्षेत्र नम्बर–४ का क्षेत्रीय सचिव रोशन कुमार खड्काले कार्यक्रम संचालन गरेका थिए ।
