इनरुवा । नेकपा एकीकृत समाजवादी सुनसरीले भोक्राहा–नरसिंह गाउपालिका ६ नम्बर वडामा पार्टीको वडा कमिटीमा जलाल अन्सारी चयन भएका छन । बुधवार नेकपा एसले संगठन विस्तार अभियान अन्र्तगत भोक्राहा–नरसिह ६ मा आयोजित वडाभेलाबाट जलाल अन्सारीको अध्यक्षतामा ५१ सदस्य वडा कमिटी गठन गरेको हो ।
नेकपा एसका भोक्राहा–नरसिंह पालिकाका अध्यक्ष जावेद आलमका अनुसार वडा कमिटीको उपाध्यक्षमा सागिर अन्सारी, सचिवमा रतनलाल देवसहित रहेका छन । नेकपा एसका केन्द्रीय सदस्य तथा सुनसरी सह–इन्चार्ज केशव तिम्सिनाले नवगठित कमिटीका पदाधिकारी तथा सदस्यहरुलाई पद तथा गोपनियताको सपथ ग्रहण गराएका थिए । भेलामा बोल्दै केन्द्रीय सदस्य तिम्सिनाले प्रतिनिधिसभामा सरकारले पेश गरेको एमसीसी सम्झौताको विपक्षमा नेकपा एस रहेकाले राष्ट्रघाती सम्झौताका विरुद्धमा पार्टीका सवै नेता कार्यकर्ताले डटेर सामाना गर्दै विरोधमा उत्रिने बताए ।
उनले आगामी वैशाख ३० गते हुने निर्वाचनमा सरकारमा रहेका राजनीतिक दलहरुको बिचको गठबन्धनबाट गठबन्धन नभए अन्य दलसँगको मोर्चाबन्दी गरेर केपी ओली प्रवृतिलाई निर्वाचनबाट जनताको अभिमतले परास्त गर्ने बताए ।
तिम्सिनाले सुनसरी जिल्लाका १२ पालिका र १२४ वटा वडामा नेकपा एसले जनप्रनितिनिधि निर्वाचित गराउन सशक्त संगठन निर्माणमा जोड दिएको बताए ।
भोक्राहा–नरसिंह पालिकाका अध्यक्ष जावेद आलमको अध्यक्षतामा भएको भेलामा नेकपा एसका सुनसरी अध्यक्ष गोविन्द निरौला, प्रदेश सदस्य किरण कार्की, ब्रह्मदेव यादव, कार्यालय सचिव विनोद कटुवाल, जिल्ला सदस्यहरु कलिम अन्सारी, कदमलाल उराँव, बच्चालाल यादव लगायतले बोलेका थिए ।
