इनरुवा । इनरुवा नगरपालिका वडा नम्बर–३ का सुखिलाल मण्डलको १० वर्षीया छोरी रामदुलारी मण्डललाई उपचार गर्न भरतपुर पठाइएको छ । १० वर्षिया बालिका मण्डलको घुडामा चोट लागी टयुमरको संकेत देखेपछि इनरुवा–२ का युवा नेता दिलिप चन साहुको सहयोगमा एम्बुलेन्स व्यवस्था गरी उपचारका लागि भरतपुर क्यान्सर अस्पताल पठाइएको हो ।
इनरुवा–३ खोला किनारामा घर बनाई बसोवास गर्दै आएका सुखिलाल मण्डल सुकुम्वासी हुन् । मण्डल आर्थिक अवस्था कमजोर भएका कारण छोरीको उपचार नगराई घरमै राखेको सुनेर युवा नेता साहुले उपचारको प्रवन्ध मिलाएर भरतपुर पठाएका छन् ।
युवा नेता साहुले एम्बुलेन्सको व्यवस्था गरी नगद २५ हजार आर्थिक सहयोग जुटाएर १० वर्षीया बालिका रामदुलारीलाई उपचार गर्न भरतपुर क्यान्सर अस्पताल पठाइएको र उपचारमा लाग्ने खर्चका लागि आर्थिक सहयोग संकलन गरी सहयोग गर्ने बताएका छन् । साहुले आर्थिक संकलन कार्यमा जुटेको र उपचारमा लाग्ने सम्पुर्ण खर्चको व्यवस्था मिलाइरहेको बताए ।
‘सेवा नै धर्म’ हो उनले भने,‘बालिकालाई आर्थिक अभावका कारण उपचार गर्न समस्या भएको थियो, त्यसैले आफुले पहल गरेर आर्थिक सहयोग गरी उपचारका लागि भरतपुर पठाएका छौं ।’ उपचारको अभावले घरमा छटपटाइरहेको अवस्थामा आफु लगायत युवाहरुले आर्थिक सहयोग जुटाई तत्काल उपचारका लागि पठाएको र उपचारमा लाग्ने खर्चको जोहो गरिरहेको छु ।’
१० वर्षिया बालिकाको उपचारमा सहयोगी हातहरुलाई समेत उनले आग्रह गरेका छन् । बालिकाको जीवन रक्षाका लागि आफुहरुले सहयोग गरेको र सहयोग गर्ने इच्छुक व्यक्तिहरुले पनि आर्थिक सहयोग गरी उपचारमा हातैमालो गरिदिनका लागि युवा नेता साहुले अनुरोध समेत गरेका छन् ।
