हरिनगर । नेपाल सरकारले स्थानिय तहको निर्वाचन आगामी २०७९ बैशाख ३० गतेको मिति घोषणा गरेपछि पार्टीहरुले गाउँकेन्द्रीत भेला, प्रशिक्षण लगायतका कार्यक्रमहरु सार्वजनिक गर्दै व्यस्त हुन थालेका छन् । यस क्रममा हरिनगर गाउँपालिकामा पनि विभिन्न पार्टीको चहल पहल बढन थालेको छ भने अध्यक्ष पदका लागि आंकाक्षीहरुले आ–आफ्नो दावी प्रस्तुत गर्नथालेका छन् ।
स्थानिय तहको निर्वाचन मिति नजिकिदै जाँदा चुनावी सरगर्मि बढ्दै गएको पाइएको छ ।
हरिनगर गाउँपालिकामा नेपाली कांग्रेसको तर्फबाट गत स्थानिय तहको निर्वाचनमा अध्यक्ष पदमा गफार अन्सारी निर्वाचित भएका थिए । उनका प्रतिद्वन्द्वी नेकपा एमालेबाट लस्करी अन्सारी, तत्कालिन संघीय समाजवादी पार्टीबाट हेमनारायण मेहता थिए । नेपाली कांग्रेसको तर्फबाट टिकट पाएर हरिनगर गाउँपालिकाका अध्यक्ष गफार अन्सारीले पाँच वर्षमा हरिनगरको विकासमा फ्डको मारेको बताएका छन् । अध्यक्ष अन्सारीले हरिनगर गाउँपालिकाको मुहार फेरिएको र केही कामहरु गर्न बाँकी रहेकोले आउँदो स्थानिय तहको निर्वाचनमा पुनः अध्यक्ष पदमा उम्मेदवारी रहने बताउँदै आएका छन ।
हरिनगर गाउँपालिकामा आफु निर्वाचित भएपछि हरिनगरको विकासमा दिनरात एक गरेर जनताको लागि काम गरेको हुदाँ पुनः अध्यक्ष पदमा उम्मेदवारी रहने उनले बताए । नेपाली कांग्रेसको तर्फबाट आउँदो बैशाख ३० गते हुने स्थानिय तहको निर्वाचनमा आफु अध्यक्ष पदमा नै दोहोरिने निश्चित भएको उनले बताए । अध्यक्ष अन्सारी पुनः अध्यक्ष पदको उम्मेदवार हुने बजारमा चर्चा चल्न थालेपछि हरिनगर गाउँपालिकामा अन्य दलका प्रतिनिधिहरु आत्तिएका छन् । अध्यक्ष अन्सारीले हरिनगर गाउँपालिकामा प्रत्यक्ष जनतासँग भेटघाट र चुनावी प्रचार प्रसारलाई तिब्रता दिएका छन् ।
नेपाली कांग्रेसको संगठनलाई बलियो बनाउनका लागि अहिले ‘घर–घर जाऔं कांग्रेस जिताऔं’ अभियानलाई हरिनगर गाउँपालिकामा तिब्रता दिँदै कांग्रेसको संगठनलाई सुदृढिकरण गर्दै अगाडी बढिरहेको उनले बताए ।
गत स्थानिय तहको निर्वाचनमा नेपाली कांग्रेसबाट टिकट नदिएपछि हेमनारायण मेहता नेपाली कांग्रेस परित्याग गरी तत्कालिन संघीय समाजवादी फोरम नेपालमा प्रवेश गरेका थिए । संघीय समाजवादी फोरमबाट टिकट पाएर हरिनगर गाउँपालिकाको अध्यक्ष पदका उम्मेदवार बनेका हेमनारायण मेहता गफार अन्सारीसँग पराजित भएका थिए ।
नेपाली कांग्रेसमा पुनः घर फर्किएका मेहता आउँदो स्थानिय तहको निर्वाचनमा नेपाली कांग्रेसको तर्फबाट अध्यक्ष पदका उम्मेदवारका आंकाक्षी हुन् । अहिलेसम्म नेपाली कांग्रेसबाट गफार अन्सारी र हेमनारायण मेहता अध्यक्ष पदका आंकाक्षी रहेको बताइएको छ ।
त्यसैगरी नेपाल कम्युनिष्ट पार्टी नेकपा एमालेबाट हरिनगर गाउँपालिकाका अध्यक्ष पदमा लस्करी अन्सारी र ताहिर अन्सारीको चर्चा चलेको छ ।
गत स्थानिय तहको निर्वाचनमा गफार अन्सारीसँग पराजित भएका लस्करी अन्सारी यसपटकको निर्वाचनमा पुनः नेकपा एमालेबाट टिकट पाउने चर्चा सुरु भएपछि हरिनगर गाउँपालिकामा चुनावी सरगर्मि बढ्दै गएको पाइएको छ । नेकपा एमालेबाट हरिनगर गाउँपालिकाका अध्यक्ष पदमा दुई जना आंकाक्षी रहेको समाचार श्रोतको दावी छ । नेकपा एमालेबाट लस्करी अन्सारी र ताहिर अन्सारी दुवै जनाले नेकपा एमालेको संगठन विस्तार र आन्तिरक प्रचार प्रसारमा व्यस्त रहेको पाइएको छ । स्थानिय चुनावलाई लक्षित गर्दै हरिनगर गाउँपालिकाभित्र जनतासँग प्रत्यक्ष भेटघाटमा उनीहरु व्यस्त रहेको समाचार श्रोतले जनाएको छ । लस्करी र ताहिर अन्सारी मध्ये कसले टिकट पाउने भन्ने बारेमा अन्योल रहेको छ ।
त्यसैगरी जनता समाजवादी पार्टी नेपालबाट हरिनगर गाउँपालिकाको अध्यक्ष पदमा धर्मवीर आर्य समेत आंकाक्षी रहेको पाइएको छ । जसपाबाट एकल उम्मेदवारको रुपमा प्रस्तुत भएका धर्मवीर आर्य अध्यक्ष पदका लागि जनतासँग भोट माग्न सुरु गरेका छन् । हरिनगर गाउँपालिकाका अध्यक्ष पदमा आंकाक्षी मेहताले परिर्वतनको आवश्यकता रहेकोले आफु चुनावी प्रचार प्रसार र घरदैलौमा व्यस्त भएको बताएका छन् ।
त्यसैगरी नेकपा माओवादी केन्द्रबाट हरिनगर गाउँपालिकाका अध्यक्ष पदमा तीन जना उम्मेदवार आंकाक्षी रहेको पाइएको छ । नेकपा माओवादी केन्द्रबाट दिलमहम्मद मियाँ, मोहन यादव र तुफेल अहमद अन्सारीको नाम चर्चामा आएपनि पार्टीले कसलाई टिकट
दिने भन्ने बारेमा कुनै निर्णय भएको छैन् । तथापी तीन जना मध्ये एक जनाले नेकपा माओवादी केन्द्रबाट टिकट पाउने र चुनावी मैदानमा उत्रिने छन् ।
