इनरुवा । असोज ३ गते संविधान दिवसका अवसरमा नेपाल सरकारले घोषणा गरिएको सुप्रवल जनसेवा श्री मान पदवी आज सुनसरीको दुई पालिकाका प्रमुखहरु सम्मानित भएका छन् ।
इनरुवा नगरपालिकाका नगर प्रमुख राजन मेहता र हरिनगर गाउँपालिकाका अध्यक्ष गफार अन्सारीलाई राष्ट्रपति विद्यादेवी भण्डारीद्धारा सुप्रवाल जनसेवा श्री मान पदवी सहित बिभुषित भएका हुन् । सुनसरीको इनरुवा नगरपालिका र हरिनगर गाउँपालिकाले गरेको विकास निर्माणको उच्च मुल्यांकन गर्दै नेपाल सरकारले उनीहरुलाई बिभुषित गरेका हुन् ।
सुनसरीको इनरुवा नगरपालिकाका नगर प्रमुख मेहता र हरिनगर गाउँपालिकाका अध्यक्ष अन्सारी लोकप्रिय नेताका रुपमा परिचित छन् । राष्ट्रपति विद्यादेवी भण्डारीले एक कार्यक्रमका बीच सुप्रवल जनसेवा श्री पदक प्रदान गरी उनीहरुलाई विभुषित गरेको हो ।
नेपाल सरकारले संघिय लोकतान्त्रिक गणतन्त्रको पहिलो स्थानीय सरकारको रुपमा रहेको हरिनगर गाउँपालिका र इनरुवा नगरपालिकाका पहिलो जननिर्वाचित अध्यक्ष अन्सारी तथा नगर प्रमुख मेहताले विकास निर्माणमा उदाहरणीय काम गरेको मुल्यांकन गर्दै नेपाल सरकारले असोज ३ गते संविधान दिवसको अवसरमा सो मान पदवी घोषणा गरेपनि आज नयाँ वर्ष २०७९ को अवसरमा बिभुषित गरिएको जनाएको छ ।
हरिनगर गाउँपालिकाका अध्यक्ष गफार अन्सारीले दुर्गम क्षेत्र खास गरि भारतको सिमा सँग जोडिएका गाउँघर वस्ती सम्म जोडने सडकहरुलाई वहुवर्षिय गौरवशाली योजना संचालन गरी अस्फाल्ड प्रविधिको कालोपत्रे काम , दुर्गम क्षेत्रका जनताको कृषि , स्वास्थ्य र शिक्षामा पहुँच , शान्ति सरक्षामा व्यापक सुधार लगायतका नमुना कार्यहरु गरेका कारणले राज्यले वहाँको कामको मुल्याँकन गर्दै सुप्रवल जनसेवा श्री पदकबाट विभुषित गरेको हो ।
यसै गरि सुनसरीका सदरमुकाम समेत रहेका इनरुवा नगरपालिकाका नगर प्रमुख राजन मेहताको विकासमा मारेको फडकोको उचित मुल्याँकन गर्दै मेहतालाई पनि सुप्रवल जनसेवा श्री पदकबाट विभुषित गरेका छन् । इनरुवा नगर प्रमुख मेहता र हरिनगरका अध्यक्ष अन्सारीले सुनसरी सहित मुलुकमा पहिचान स्थापति गरेसँगै इतिहास कायम गरेको बुद्धिजिविहरुको भनाई छ ।
सुनसरीमा कैयौ वर्षपछि सुनसरीका दुई विकासप्रेमी नेताहरुले जनताले चाहेको जस्तो विकास गरेर मुलुकमा पहिचान कायम गरेका हुनाले राज्यले मान पदवी सहित उनीहरुलाई सम्मानित गरिएको छ । सुनसरीका १२ वटा स्थानीय तहहरु मध्ये इनरुवाका प्रमुख मेहता र हरिनगरका अध्यक्ष अन्सारीले सुप्रवल जनसेवा श्री पदकबाट सम्मानित भएपछि सो क्षेत्रको मान मर्यादा र शान बढेको बुझिएको छ ।
यता हरिनगरका अध्यक्ष अन्सारीले हरिनगर गाउँबासीको सदभावले ठुलो उपलब्धि पाएको बताएका छन् । सुप्रवल जनसेवा श्री पदकबाट बिभुषित भएपछि उनी खुशी हुँदै हरिनगरबासीले देखाएको सदभाव, साथ र सहयोगले आफुले मान पदवीबाट सम्मानित भएकाले हरिनगबासीको गौरवको कुरा भएको उनले बताएका छन् ।
