इनरुवा । नेपाली कांग्रेसबाट टिकट पाएर इनरुवा नगरपालिकाको मेयर पदमा नेपाली कांग्रेस सुनसरीका सभापति केदार भण्डारीले आज मनोनयन दर्ता गराएका छन् । स्थानीय तह निर्वाचन २०७९ का लागि नेपाली कांग्रेसबाट उम्मेदवार बनेका भण्डारीले आज मुख्य निर्वाचन अधिकृतको कार्यालयमा मनोनयन दर्ता गराएका हुन् ।
त्यसैगरी नेपाली कांग्रेसबाट टिकट पाएर उपमेयरमा बिनिता मेहताले उम्मेदवारी दर्ता गराएका छन् । नेपाली कांग्रेसका युवा नेता योगेन्द्र प्रसाद मेहताको श्रीमति हुन् बिनिता मेहता । नेपाली कांग्रेसको १४ औं महाधिवेशनमा इनरुवा नगर सभापतिमा पराजित भएका योगेन्द्र प्रसाद मेहताले आप्mनो श्रीमतिलाई स्थानीय तहको निर्वाचनमा कांग्रेसको तर्फबाट इनरुवा नगरपालिकाको उपमेयरको टिकट दिलाउन सफल भएका छन् । आज मुख्य निर्वाचन कार्यालयमा मेहताले उपमेयर पदमा मनोननय दर्ता गराएकी छिन् ।
त्यसैगरी नेपाली कांग्रेसको तर्फबाट इनरुवा–१ को वडाध्यक्ष पदमा प्रमोद पोखरेल, इनरुवा–२ बाट रन्जेश भट्टराई, इनरुवा–३ मा रोशन कुमार खड्का, इनरुवा–४ मा जितेन्द्र यादव, इनरुवा–५ मा अनिल पोखरेल, इनरुवा–६ मा सुमन थापा, इनरुवा–७ मा हिक्मत सिंह, इनरुवा–८ मा रविन्द्र मण्डल, इनरुवा–९ मा कृष्णप्रसाद मेहता र इनरुवा–१० मा डाक्टर खलिल अख्तर मियाँले वडाध्यक्ष पदको टिकट पाएर मनोनयन दर्ता गराएका छन् ।
नेपाली कांग्रेसले इनरुवा नगरपालिकाको मेयर, उपमेयर, वडाध्यक्ष र सदस्यहरुमा युवाहरुको बढी सहभागिता गराएर टिकट उपलब्ध गराएका छन् । यही बैशाख ३० गते हुने स्थानीय तहको निर्वाचनमा नेपाली कांग्रेसको रुख चिन्हमा मतदान गरी कांग्रेसका उम्मेदवारहरुलाई बिजयी बनाउन मतदाताहरुलाई मेयर पदका उम्मेदवार भण्डारीले अनुरोध गरेका छन् ।
