इनरुवा । नेपाली कांग्रेसबाट उपमेयरको दावी गर्दै आएकी विनिता दाहालले पार्टीबाट टिकट नपाएपनि अन्ततः उपमेयर पदमा बागी उम्मेदवारी दिएकी छिन् ।
नेपाली कांग्रेसले विनिता कुमारी मेहतालाई आफ्नो आधिकारिक उपमेयरको उम्मेदवार घोषणा गरेपछि दाहालले आफ्नो बागी उम्मेदवारी दर्ता गराएकी हुन ।
त्यसैगरी इनरुवा वडा नं. ५ का निवर्तमान वडाध्यक्ष अन्जनी कुमार पोखरेलले पनि नेकपा एमालेले आफ्नो वडाध्यक्ष पदमा गोपी ढकालको नाम घोषणा गरेपछि बागी उम्मेदवारी दर्ता गराएका छन् । वडा नं. ५ को वडाकमिटीले उम्मेदवारी घोषणामा चित्त नबुझेको भन्दै राजीनामा गरेपछि अन्जनी कुमार पोखरेलले स्वतन्त्र उम्मेदवारको रुपमा आफ्नो उम्मेदवारी घोषणा गरेका हुन ।
यसैगरी नेपाली कांग्रेसबाट यसअघिको स्थानीय निर्वाचनमा वडा नं. ३ मा झिनो मतले वडाध्यक्ष पदमा पराजित भएका सितोष पोखरेलले समेत पार्टी निर्णयको वेवास्ता गर्दै वडाध्यक्ष पदमा आफ्नो मनोनयन दर्ता गराएका छन् । नेपाली कांग्रेसबाट अघिल्लो दिनसम्म वडाध्यक्ष पदमा उनकै नाम आए पनि अन्तिम समयमा पार्टीले रोशन खडाकालाई वडा नं. ३ को वडाध्यक्ष पदका लागि घोषणा गरेको थियो ।
पोखरेलको मनोनयन दर्ता गराउन सो वडाका सैयौं स्थानीय मतदाताहरु उनको साथमा मनोनयन दर्ता गराउन पुगेका थिए ।
यसैगरी वडा नं. २ बाट पार्टीले रन्जेल भट्टराईलाई आफ्नो आधिकारिक वडाध्यक्षको उम्मेदवार घोषणा गरेपछि बबिता स्वर्णकारले आफ्नो स्वतन्त्र उम्मेदवार मनोनयन दर्ता गराएकी छिन । यसअघि स्वर्णकार सो वडाबाट सदस्य पदका लागि दावी गर्दे आएकी थिइन । इनरुवाका कुनै पनि वडामा महिलालाई वडाध्यक्ष पदमा उम्मेदवार नबनाएकाले आफुले वडाध्यक्ष पदमा स्वतन्त्र उम्मेदवारी दर्ता गराएको उनले बताइन ।
