इनरुवा । स्थानीय तह निर्वाचन २०७९ का लागि हरिनगर गाउँपालिकाको अध्यक्ष पदमा बिभिन्न दलहरुबाट सातजनाले अध्यक्ष पदमा मनोनयन दर्ता गराएका छन् ।
हरिनगर गाउँपालिकाको अध्यक्ष पदमा नेपाली कांग्रेस लगायतका अन्य दलहरुबाट छुट्टा छुट्टै मनोनयन दर्ता गराएका हुन् । मुलुकभर नै पाँच दलीय सतारुढ गठवन्धन भएर निर्वाचनमा होमिएपनि सुनसरीको हरिनगर गाउँपालिकामा गठवन्धन हुन नसकेपछि पाँच दलले छट्टा छुट्टै उम्मेदवारी दर्ता गराएका हुन् ।
सुनसरीको धरान र इटहरीमा गठवन्धनबाट उम्मेदवार बनेपनि अन्य पालिकाहरुमा नेपाली कांग्रेस सहित अन्य दलहरुले अध्यक्ष सहित वडाध्यक्ष र सदस्य पदमा मनोनयन दर्ता गराएका छन् ।
नेपाली कांग्रेसबाट हरिनगर गाउँपालिकाको अध्यक्ष पदमा पुनः गफार अन्सारीले टिकट पाएर आज मनोनयन दर्ता गराएका छन् । नेपाली कांग्रेस हरिनगर गाउँपालिकाले अध्यक्ष पदमा अन्सारी सहित ६ जनाको नाम सिफारिस गरेपनि नेपाली कांग्रेसको निर्णय अनुसार उनलाई सिफारिस गरेपछि पार्टीको अधिकारीक टिकट लिएर आज मनोनयन दर्ता गराएका हुन् ।
गत स्थानीय तहको निर्वाचन २०७४ मा पनि नेपाली कांग्रेसको टिकट पाएर भारी मतले बिजयी भएका युवा नेता अन्सारीले यस पटकमा पनि बाजी मारेका छन् । २०७२ सालमा जारी भएको संविधान पछि पहिलो पटक स्थानीय तहको निर्वाचनमा हरिनगर गाउँपालिकाको अध्यक्ष पदमा बिजयी भएका युवा नेता गफार अन्सारीले पाँच वर्षे कार्यकालमा स्व.गिरिजा प्रसाद कोइरालाको सपनालाई सकार पार्दै हरिनगर गाउँपालिकाको मुहार फेर्न सफल भएका अध्यक्ष अन्सारीले जनताको भावना अनुसार काम गरेकाले अध्यक्ष पदमा पुनः उम्मेदवारी दर्ता गराएका हुन् ।
हरिनगर गाउँपालिकामा विकासको लहरमा फड्को मारेकोले अधुरा कामलाई पूरा गर्नका निमित पुनः अध्यक्ष पदमा उम्मेदवारी दिएकाले अत्यधिक बहुमतका साथ बिजयी बनाउन हरिनगरबासीलाई उनले अनुरोध गरेका छन् । हरिनगर गाउँपालिकामा अधुरा कामहरुलाई पूरा गर्न र हरिनगर गाउँपालिकालाई नमूना बनाउनका लागि एक पटक पुनः अध्यक्ष, उपाध्यक्ष, वडाध्यक्ष र सदस्यहरुलाई कांग्रेसको रुख छापमा मतदान गरी बिजयी बनाउन हरिनगरबासीहरुलाई अपिल गरेका छन् ।
नेपाली काँग्रेसबाट अध्यक्षमा गफार अन्सारी, नेकपा (एमाले) बाट अध्यक्षमा लस्करी अन्सारी, जनता समाजवादी पार्टी नेपालबाट धर्मविर आर्य, नेकपा माओवादी केन्द्रबाट कलावती उराँव, जनमत पार्टीबाट कपलेश्वर (कपिल) यादव, स्वतन्त्रबाट सज्जाद अन्सारी र जलेश्वर उराँवले उम्मेदवारी दर्ता गराएका छन ।
नेपाली काँग्रेसबाट उपाध्यक्षमा रिमझिम कुमारी भगत, नेकपा एमालेबाट उपाध्यक्षमा कोशीला कुमारी शाह, जनता समाजवादीबाट उपाध्यक्षमा कसिरा खातुन, नेकपा माओवादी केन्द्रबाट उपाध्यक्षमा दिलमहम्द मियाँ, जनमत पार्टीबाट उपाध्यक्षमा गिता रामले उम्मेदवारी दर्ता गराएका छन् ।
लामो समयदेखि जनता माझ रहेर काम गर्दै आएका गफार अन्सारीलाई हरिनगरबासीले मतदान गरी बिजयी बनाउने छन् । दोश्रो कार्यकालमा पनि अध्यक्ष पदमा जिताउने अठोट लिएका हरिनगरबासीले उनको प्रचार प्रसारमा व्यस्त भएका छन् । हरिनगर गाउँपालिकाकी उपाध्यक्ष रिमझिम कुमारी भगतले समेत पुनः उपाध्यक्ष पदमा उम्मेदवारी दर्ता गराएकी छिन् । नेपाली कांग्रेसबाट पुनः टिकट पाएर आज हरिनगर गाउँपालिका उपाध्यक्ष पदका लागि मनोनयन दर्ता गराएकी हुन् ।
त्यसैगरी नेपाली कांग्रेसको तर्फबाट वडाध्यक्ष पदका लागि हरिनगर– १ मा लतिफ मियाँ, हरिनगर–२ मा सलामुद्धिन अन्सारी, हरिनगर–३ मा अरविन्द मेहता, हरिनगर–४ मा राजेश कुमार पाल, हरिनगर–५ मा सिकमलाल मेहता, हरिनगर–६ मा हाजी तैयव अन्सारी र हरिनगर–७ मा अब्दुल अन्सारीले पनि मनोनयन दर्ता गराएका छन् ।
हरिनगर–१ मा वडाध्यक्ष पदमा मियाँले पुनः उम्मेदवारी दर्ता गराएका छन् भने हरिनगर–३ मा अरविन्द मेहताले समेत पुनः वडाध्यक्ष पदमा दोहोर्याएका छन् । गत चुनावमा मेहता संघीय समाजवादी पार्टीबाट उम्मेदवार बनेका थिए भने यसपटक नेपाली कांग्रेसबाट उम्मेदवार बनेका हुन् । त्यसैगरी हरिनगर–४ मा राजेश कुमार पाल गत स्थानीय तहको निर्वाचनमा कांग्रेसको तर्फबाट वडा सदस्यमा निर्वाचित भएका पाल यस पटकको निर्वाचनमा हरिनगर–४ का लागि वडाध्यक्ष पदको टिकट पाएर उम्मेदवारी दर्ता गराएका छन् ।
