इनरुवा । स्थानीय तह निर्वाचन २०७९ का लागि देवानगंज गाउँपालिकाको अध्यक्ष पदका लागि नेपाली कांग्रेसको तर्फबाट श्यामलाल मेहताले सोमवार उम्मेदवारी दर्ता गराएका छन् । कांग्रेसको निर्णय अनुसार देवानगंज गाउँपालिकाको अध्यक्ष पदका उम्मेदवार मेहताले टिकट पाएपछि सोमवार मुख्य निर्वाचन अधिकृतको कार्यालयमा उम्मेदवारी दर्ता गराएका हुन् ।
त्यसैगरी नेपाली कांग्रेसको तर्फबाट देवानगंज गाउँपालिकाको उपाध्यक्ष पदका लागि विभादेवी यादवले मनोनयन दर्ता गराएकी छिन् । गत स्थानीय तहको निर्वाचनमा श्यामलाल मेहता तत्कालिन मधेशी जनअधिकार फोरम नेपालबाट टिकट पाएर पालिका अध्यक्षमा पराजित भएका थिए । तर नेपाली कांग्रेस र फोरम लोकतान्त्रि पार्टी समायोजन भएपछि नेपाली कांग्रेसको १४ औं महाधिवेशनमा सुनसरी क्षेत्र नम्बर–२ प्रदेश(ख) मा सर्वसम्मतबाट सभापति पदको जिम्मेवारी पाएका थिए ।
पार्टीको संगठनलाई बलियो बनाउने काममा लागि परेका मेहता यस पटकको स्थानीय तहको निर्वाचनमा नेपाली कांग्रेसको तर्फबाट टिकट पाएर पालिकाको अध्यक्ष पदका उम्मेदवार बनेका छन् ।२०७४ को स्थानीय तहको निर्वाचनमा नेपाली कांग्रेसको तर्फबाट अध्यक्ष पदमा लाली प्रसाद मेहता र उपाध्यक्ष पदमा पुनिता देवी यादव निर्वाचित भएका थिए । तर यस पटकको निर्वाचनमा नेपाली कांग्रेसले अध्यक्ष मेहता र उपाध्यक्ष यादवलाई आउट गरेर नयाँ अनुहारलाई पालिकामा इन गराएको छ ।
त्यसैगरी नेपाली कांग्रेसको तर्फबाट वडाध्यक्ष पदका लागि देवानगंज–१ मा सुर्य नारायण पाल, देवानगंज–२ मा मजलुम अन्सारी, देवानगंज–३ मा पुलेन मेहता, देवानगंज–४ मा चन्देश्वर मेहता, देवानगंज–५ मा अशोक यादव, देवानगंज–६ मा देव नारायण मेहता र देवानगंज–७ मा बद्री यादवले उम्मेदवारी दर्ता गराएका छन् । देवानगंजका वडाहरुमा प्रायजसो पुरानै अनुहारलाई वडाध्यक्ष पदमा प्राथमिकता दिइएको छ ।
