टोमराज मेहता
इनरुवा । नेपाली कांग्रेसकी नेतृ सुनसरी इनरुवाबासी फरिदा खातुनलाई नेपाली कांग्रेसको निर्वाचन सुरक्षा निकाय समन्वय उपसमितिमा मनोनित गरेको छ ।
नेपाली कांग्रेसका उपसभापति एवं स्थानीय तह निर्वाचन केन्द्रीय परिचालन समितिका संयोजक श्री पूर्णबहादुर खड्काले आसन्न स्थानीय तहको निर्वाचनका सन्दर्भमा केन्द्रीय परिचालन समिति अन्तर्गत केन्द्रीय सदस्य श्री रामहरि खतिवडाको संयोजकत्वमा गठित “निर्वाचन सुरक्षा निकाय समन्वय उपसमिति” मा सुनसरीबाट फरिदा खातुनलाई मनोनित गरेको हो ।
नेपाली कांग्रेस सुनसरीले मुस्लिम महिलालाई स्थान नदिएको भन्दै आलोचना भइरहेको बेला नेपाली कांग्रेसले इनरुवाबासी फरिदा खातुनलाई निर्वाचन सुरक्षा निकाय समन्वय उपसमितिको सदस्यमा मनोनित गरेपछि अहिले मुस्लिम समुदाय उत्साहित भएका हुन् ।
नेपाली कांग्रेसले स्थानीय तहको निर्वाचनका लागि बिभिन्न उपसमितिहरु गठन गरिरहेको बेला बिशेष महत्वका साथ सुनसरी जिल्लालाई हेरिएको छ । नेपाली कांग्रेसको १४ औं महाधिवेशनमा पनि सुनसरीबाट चार जना केन्द्रीय सदस्य निर्वाचित भएका थिए भने नेपाली कांग्रेस युवा प्रचार नेटर्वक उपसमितिमा सुनसरीबाट दुई जना मुस्लिम युवा नेता र एक जना इटहरीबाट सो उपसमितिमा मनोनित गरिएको थियो ।
सो उपसमितिमा सुनसरी भोक्राहा नरसिंहका डा. अबुल हुसेन अन्सारी र हरिनगरका वरिष्ठ पत्रकार ताविल अन्सारी तथा इटहरीबाट युवा नेता विकास केसीलाई मनोनित गरिएको थियो ।
स्थानीय तहको निर्वाचनमा हरिनगर, कोसी र भोक्राहा नरसिंह गाउँपालिकामा मुस्लिम समुदायबाट अध्यक्ष पदको उम्मेदवार बनाईएको छ । हरिनगरमा गफार मियाँ अन्सारी, कोसीमा ऐयुव अन्सारी र भोक्राहा नरसिंहमा अजमल अख्तर आजादलाई नेपाली कांग्रेसको तर्फबाट अध्यक्ष पदमा टिकट उपलब्ध गराएर अहिले उनीहरु चुनावी मैदानमा होमिएका छन् ।
स्थानीय तहको निर्वाचन २०७९ बैशाख ३० गते हुँदैछ । चुनावी माहौलमा जातिय प्रोपगण्डा अपनाएर केही राजनीतिक दल र केही सञ्चारकर्मीहरुले बदनाम गराउन खोजेर मत बटुल्नका लागि काम गर्दै आइरहेको बेला मतदाताहरुलाई सर्तक र सजग रहन समेत नेपाली कांग्रेस सुनसरीले अपिल गरेको छ ।
नेपाली कांग्रेसले मुस्लिम समुदायलाई उच्च सम्मान गरेको सुनसरी कांग्रेसीहरु बताउँदै आइरहेका छन् । नेपाली कांग्रेसले बिभिन्न उपसमितिहरु गठनमा समेत मुस्लिम नेताहरुलाई समेट्दै आएको छ ।
त्यसैगरी निर्वाचन सुरक्षा निकाय समन्वय उपसमितिमा समेत सुनसरीकी नेतृ फरिदा खातुनलाई काम गर्ने अवसर प्रदान गरिएको छ । नेतृ खातुनले नेपाली कांग्रेसले ठूलो अवसर प्रदान गरेकोमा धन्यवाद ज्ञापन समेत गरेकी छिन् ।
नेपाली कांग्रेस सबै जातजातिहरुहरुको साझा पार्टी भएकोले २०७९ बैशाख ३० गते हुन गइरहेको निर्वाचनबाट देशकै शक्तिशाली पार्टी बनाउनका लागि नेपाली कांग्रेसको चुनाव चिन्ह रुख छापमा मतदान गरी ७५३ वटै स्थानीय तहका उम्मेदवारहरुलाई बिजयी बनाउनुपर्नेमा जोड दिएकी छिन् ।
