इनरुवा । इनरुवा कार्यक्षेत्र बनाएर विगत २५ वर्षदेखी निरन्तर पत्रकारिता क्षेत्रमा लागेका इनरुवा–२ निवासी इकवाल अहमद आज राष्ट्रिय पत्रकारिता पुरस्कार २०७८ बाट पुरुस्कृत एवं सम्मानित हुनुभएको छ ।
राष्ट्रिय पत्रकारिता दिवस २०७९ को अवसरमा राष्ट्रपति भवन शितल निवासमा आयोजित एक समारोहका बीच पत्रकार अहमदलाई राष्ट्रपति विद्यादेवी भण्डारीले एक लाखको पुरस्कार राशी सहित सम्मान गर्नुभएको हो ।
२०५४ सालदेखी निरन्तर नेपाली पत्रकारिता क्षेत्रमा क्रियाशिल पत्रकार अहमद मुलुकका आधा दर्जन बढी सञ्चार माध्यमहरुमा काम गरिसकेका छन् । विगत आठ वर्षदेखी सुनसरी सदरमुकाम इनरुवाबाट प्रकाशित भइरहेको प्रतिक्षण दैनिकको प्रकाशक तथा सम्पादकको रुपमा हाल कार्यरत हुनुहुन्छ । नेपाल प्रेस युनियनका पुर्व केन्द्रीय सदस्य रहनुभएका अहमद नेपाल पत्रकार महासंघका बहालवाला केन्द्रीय सदस्य समेत हुनुहुन्छ ।
इनरुवा नगरपालिका वडा नम्बर–२ निवासी अब्दुल अजिज अहमद तथा स्वर्गिय इमराना खातुनको प्रथम सुपुत्रको रुपमा २०३६ साल फागुन २ गते जन्मिनु भएका अहमद यस अघि बिभिन्न पुरस्कारहरुबाट पुरस्कृत एवं सम्मानित हुँदै आउनु भएको छ । उहाँ नेपाल सरकार सञ्चार तथा सूचना मन्त्रालय अन्र्तगतको न्यूनतम पारिश्रमिक निर्धारण समितिको सदस्य समेत रहिसक्नु भएको छ ।
राष्ट्रिय पत्रकारीता पुरस्कार २०७८ का लागि नेपाल सरकार सञ्चार तथा सूचना प्रविधि मन्त्रालयद्धारा आयोजित सो पुरस्कार वितरण तथा सम्मान कार्यक्रममा अहमदलाई सञ्चार तथा सूचना प्रविधि मन्त्री ज्ञानेन्द्र बहादुर कार्कीले दोसल्ला ओढाएर सम्मान गर्नुभएको थियो ।
सो कार्यक्रममा देशका बिभिन्न स्थानमा रही लामो समयसम्म पत्रकारीता गर्दै आउनुभएका अन्य ६ जनालाई वरिष्ठ पत्रकारीता सम्मान समेत गरिएको छ । अहमदसँगै राष्ट्रिय पत्रकारिता पुरस्कार २०७८ बाट पत्रकारहरु डी.आर पन्त, ठाकुर बेल्बासे, बालकुमार नेपाल, गंगा बराल र सम्झना वन समेत पुरुस्कृत हुनुभएको छ ।
यससँगै कोरोना महामारीका कारण वितरण हुन बाँकी रहेको २०७६ र २०७७ को राष्ट्रिय पत्रकारिता पुरस्कार समेत सोही अवसरमा राष्ट्रपति विद्यादेवी भण्डारीले विभिन्न पत्रकारहरुलाई पुरस्कार तथा सम्मान पत्र वितरण गर्नुभएको छ ।
