इनरुवा । सुनसरीको भोक्राहा नरसिंह गाउँपालिकामा नेकपा एमालेको तर्फबाट अध्यक्ष पदका उम्मेदवार महेन्द्र प्रसाद यादवले चढेकाे गाडीले ठक्कर दिदा एक जना घाइते भएका छन ।
भोक्राहा नरसिंह-४ मा नेकपा एमालेका अध्यक्ष पदका उम्मेदवार यादवले सवार गरेको गाडीले ठक्कर दिएर भागेपछि स्थानीय बासीहरु आक्रोशित भएका छन् ।
घाइते भएका वासिद अन्सारीले आफुलाई ज्यान मार्ने नियतले अध्यक्ष पदका उम्मेदवार यादव र उनका चालकले गाडीको सहयोगले घिसार्दै लगेको र बल्ल ज्यान जोगिएको बताए ।
भोक्राहा नरसिंह-४ का वासिद अन्सारीले निवर्तमान अध्यक्ष यादव सवार भएको गाडीले ठक्कर दिदा आफू घाइते भएको बताए । घाइते भएका अन्सारीको उपचार जिल्ला अस्पताल इनरुवामा हुँदैछ । उनको खुट्टा भाचिएको समाचार श्रोतले जनाएको छ ।
घाइते भएका अन्सारीका परिवारले अध्यक्ष पदका उम्मेदवार यादवले सम्पुर्ण उपचार खर्च तिर्नुपर्ने र दोषीलाई कानुनी दायरामा ल्याउनु पर्ने माग समेत प्रशासनसङ्ग गरेका छन ।
यता भोक्राहा नरसिंह गाउँपालिका निवर्तमान अध्यक्ष तथा नेकपा एमालेको तर्फबाट भोक्राहा नरसिंह गाउँपालिकाको अध्यक्ष पदमा उम्मेदवार यादवले आफुमाथि लगाइएको आरोप निराधार रहेको बताएका छन् । आफू सो सडकबाट गाडीमा सवार भैइ गईरहेको अवस्थामा एक समुहले गाडी रोकि आफुमाथी हमला गर्न खोज्दा समान्य हातपात भएको र आफ्नो ज्यान बचाउनका लागि समान्य हातपात भएको उनले स्वीकारेका छन ।
