टोमराज मेहता
इनरुवा । सुनसरीको भोक्राहा नरसिंह गाउँपालिका वडा नम्बर–६ मा नेपाली कांग्रेसका उम्मेदवार बिजयी भएको छ । नेपाली कांग्रेसको तर्फबाट भोक्राहा नरसिंह–६ को वडाध्यक्ष पदमा सराजुद्धिन अन्सारी सहित पुरै प्यानल बिजयी भएका छन् ।
भोक्राहा नरसिंह गाउँपालिका वडा नम्बर–६ का वडाध्यक्ष पदमा अन्सारीले ६०३ मत ल्याएका छन् । उनका प्रतिद्धन्द्धी जनमत पार्टीका अरुण साहले ४७१ मत ल्याएर पराजित भएका छन् । वडाध्यक्ष पदमा अन्सारीले १३२ मतान्तरले निर्वाचित भएका हुन् ।
भोक्राहा नरसिंह–६ मा गत स्थानीय तहको निर्वाचनमा तत्कालिन संघीय समाजवादी पार्टीका उम्मेदवार निर्वाचित भएका थिए । नेपाली कांग्रेसका उम्मेदवारले यस पटकको निर्वाचनमा कांग्रेसको विरासत फर्काउन सफल भएका हुन् ।
निर्वाचन अधिकृतको कार्यालय भोक्राहा नरसिंहले अन्सारी निर्वाचित भएको घोषणा गरेपछि वडा नम्बर–६ का वडाबासीहरुले खुशयाली मनाउँदै बिजयी जुलुस निकालेका छन् । नेपाली कांग्रेसको तर्फबाट उम्मेदवार बनेका नवनिर्वाचित सराजुद्धिन अन्सारीले मतदाताहरुलाई धन्यवाद ज्ञापन गरेका छन् ।
स्थानीय तहको निर्वाचन २०७९ बैशाख ३० गते मतदान गरी आपूmलाई भारी मतले बिजयी गराएकोले वडाबासीमा समर्पित रहने प्रतिवद्धता समेत उनले व्यक्त गरेका छन् । वडाबासीमो सदभाव, माया र लोकप्रिय मतका कारण नेपाली कांग्रेसको बिजयी भएकाले पाँच वर्षभित्र गुरु योजना बनाएर विकासको लहर ल्याई काम गर्ने वाचा समेत नवनिर्वाचित वडाध्यक्ष अन्सारीले गरेका छन् ।
यसैगरी भोक्राहा नरसिंह वडा नम्बर–१ को वडाध्यक्ष पदमा राप्रपाबाट लक्ष्मण मेहता, वडा नम्बर–२ मा कांग्रेसबाट आलम अन्सारी, वडा नम्बर–४ मा कांग्रेसबाट हारुन अन्सारी र वडा नम्बर–५ मा राप्रपाबाट हबिव मियाँ प्यानल सहित निर्वाचित भएका छन् । भोक्राहा नरसिंहको अन्य वडाको मतगणना जारी रहेको निर्वाचन अधिकृतको कार्यालयले जनाएको छ ।
