टोमराज मेहता
इनरुवा । सुनसरीको कोसी गाउँपालिका वडा नम्बर–७ को वडाध्यक्षमा नेकपा माओवदी केन्द्रका लालदेव सदा निर्वाचित भएका छन् । नेकपा माओवादी केन्द्रका सदा ६ सय ११ मत ल्याएर वडाध्यक्ष पदमा निर्वाचित भएका हुन् ।
उनका निकटतम प्रतिद्धन्द्धी नेपाली कांग्रेसका रामचन्द्र महतो कोइरीले ४ सय ४१ मत ल्याएर पराजित भएका छन् । नवनिर्वाचित वडाध्यक्ष सदाले १ सय ७० मतान्तरले निर्वाचित भएको निर्वाचन अधिकृतको कार्यालयले जनाएको छ ।
सदा अर्थात मुसहर समुदायबाट पहिलो जनप्रतिनिधिको रुपमा निर्वाचित भएका छन् । सदाले निर्वाचित भएपछि संचारकर्मीहरुसँग कुराकानी गर्दै जनताले पैसा र रक्सीमा नबिक्ने दावी गरेका छन् । उनले आफनै वडाका उदाहरण दिदैँ जनता जागरुक्क भएकाले काम गर्ने जोश भएका युवाहरुलाई निर्वाचनमा चुनेकाले वडाबासीहरुलाई धन्यवाद ज्ञापन समेत गरेका छन् ।
उनले भने,‘मेरो जित भनेको दलित समुदायको जित हो । अब आउने निर्वाचनमा दलित समुदाय पैसको प्रलोभन र रक्सीमा बिकने छैन् । म आर्थिक अवस्थाले कमजोर भएपनि जनताले विश्वास गरेर मतदान गरी अत्यधिक मतले निर्वाचित गराएको छ । सबैको बिश्वास र मतको कदर गर्नेछु र आगामी दिनमा विकसित वडाको रुपमा चिनाउनेछु ।’
कोसी–७ का २५ वर्षिय सदाले नेपालमै इतिहास रचेका छन् । सदा समुदायबाट प्रतिनिधित्व गरिरहेका लालदेव सदाले आउने चुनावमा पैसा र रक्सीमा विक्ने प्रथालाई अन्त्य गर्नुपर्नेमा दलित समुदाय लाग्नुपर्नेमा जोड समेत दिएका छन् ।
निर्वाचनको समयमा मुसहर अर्थात दलितहरुले रक्सी र पैसामा बिकेर मतदान गर्ने कुरा सर्वत्र चर्चा छ । तर सदाले आफनै वडाबाट दलित समुदाय पनि सक्षम रहेको प्रमाणित गरेको छ ।
