इनरुवा । इनरुवा नगरपालिका वडा नम्बर १ का नव निर्वाचित पदाधिकारीले आज पदभार ग्रहण गरेका छन् । निर्वाचित वडा अध्यक्ष प्रमोद कुमार पोखरेल सहित सबै वडा सदस्यहरुले आज १ नम्बर वडा कार्यालयमा पदभार ग्रहण गरेका हुन् ।
पदभार ग्रहण लगत्तै नव निर्वाचित वडा अध्यक्षले आफ्नो स्वबिबेकको प्रयोग गर्दै निर्वाचनमा सहभागी भई मतदान मार्फत वडाको नयाँ नेतृत्व निर्वाचित गरेकोमा वडावाशीहरुलाई धन्यवाद दिए । साथै वडाको सर्वाङ्गिण विकासका लागि आफूले सबैलाई समेटेर काम गर्ने प्रतिवद्धता व्यक्त गरे ।
नव निर्वाचित पदाधिकारीले पदभार ग्रहण गरे लगत्तै वडा भित्रका सबै टोलमा सडक बत्तिको ब्यवस्था गर्ने पहिलो निर्णयमा हस्ताक्षर गरे ।
नव निर्वाचित वडा अध्यक्ष सहित सबै सदस्यहरुलाई निवर्तमान वडा अध्यक्ष रामचन्द्र पोदार लगायतले शुभकामना दिएका थिए । वडाको विकास र समृद्धिका लागि सबै सँग मिलेर सल्लाह र सुझावको आधारमा आगामी दिनमा निर्णय गर्ने वडाध्यक्ष पोखरेलले बताएका छन् । इनरुवा–१ को बासीले दिएको सल्लाह सुझावलाई अनुसरण गर्दै वडाको विकासमा लागि पर्ने उनले प्रतिवद्धता व्यक्त गरेका छन् । वडाबासीको चाहना अनुसार विकासका गतिविधिहरुलाई द्रुत गतिमा लैजाने र पाँच वर्षमा समृद्ध वडा बनाउने संकल्प लिएको उनको भनाई छ ।
इनरुवा–१ का नवनिर्वाचित वडा सदस्यहरु प्रदीप ढकाल, दिलीप पौदार, कमला दाहाल,कविता शर्माले समेत उनीहरुले सोमवार कार्यालयमा पदभार ग्रहण गरेका छन् । नवनिर्वाचित वडा सदस्यहरुले समेत इनरुवा–१ का वडाबासीहरुलाई हार्दिक धन्यवाद दिदैँ आभार प्रकट गरेका छन् । जनताले दिएको अभिमतलाई कदर गर्दै पाँच वर्षे कार्यकाल सफल बनाउने र जनमुखी सेवा प्रवाह गर्ने प्रतिवद्धता समेत उनीहरुले व्यक्त गरेका छन् ।
