गनेश कुमार यादव
इनरुवा । सरकारका प्रवक्ता एवम् सञ्चार तथा सूचना प्रविधिमन्त्री ज्ञानेन्द्रबहादुर कार्कीले वर्तमान सरकारले कसैलाई पनि नागरिकताबाट बञ्चित नगर्ने बताउनुभएको छ ।
नेपाली काङग्रेस सुनसरी क्षेत्र नम्वर ४ ले कोसी गाउँपालिका ३ मा आज आयोजना गरेको इद मिलन कार्यक्रममा सम्बोधन गर्नुहुँदै सञ्चारमन्त्री कार्कीले सरकारले कसैलाई पनि नागरिकताबाट बञ्चित नगर्ने बताउनुभएको हो । सबैलाई नागरिकता वितरण गर्नकै लागि सरकारले नयाँ विधेयक संसदमा दर्ता गराएको उहाँले प्रष्ट पार्नुभयो । उहाँले लाखौँ युवाहरुले नागरिकता नपाएका कारणले समस्याको सामना गरिरहेको बताउनुहुँदै वर्तमान सरकारले त्यो समस्या छिट्टै समाधान गर्ने दाबी गर्नुभयो ।
नागरिकता नभएका कारणले युवाहरुले स्वास्थ्य, शिक्षा, लोकसेवा, विभिन्न सरकारी सेवाबाट बञ्चित भएको बताउनुहुँदै उहाँले यो समस्या सरकारले समाधान गर्ने बताउनुभयो । नागरिकता सम्बन्धी संसदमा दर्ता भएको नयाँ विधेयक सत्तारुढ गठबन्धनको सहमतिमा ल्याइएकोले चाँडै नै पारित हुने पनि उहाँले बताउनुभयो । सहमतिका लागि नेकपा एमालेसँग पनि छलफल गरिने उहाँले बताउनुभयो ।
अर्को प्रसंगमा मन्त्री कार्कीले देशका विभिन्न जातजाति, भाषाभाषी, धर्मसंस्कृतिको बसोबास भएका कारणले सबै क्षेत्र वर्ग र समुदायको समृद्धि नभएसम्म मुलुकको समृद्धि नहुने बताउनुभयो । इद पर्वले समाजमा एकता र शान्ति कायम गरेर देशलाई समृद्धिको दिशा तर्फ अगाडि बढाउनका लागि प्रेरणा दिने उहाँले बताउनुभयो ।
ईद मिलन कार्यक्रममा कोशी गाउँपालिकाकी उपाध्यक्ष अनिता देवी यादवले स्वागत मन्तव्य राखेकी थिइन् भने नेपाली काँग्रेका युवा नेता धिरज भट्टराई, बिरेन्द्र शाह,लगायतले शभकामना मन्तव्य राखेका थिए ।
कार्यक्रमको प्रमुख अतिथी नेपाली काँग्रेसका केन्द्रिय सदस्थ तथा सञ्चार तथा सूचना प्रविधिमन्त्री ज्ञानेन्द्रबहादुर कार्की, नेपाली काँग्रेसका केन्द्रिय सदस्य राजिव कोइराला, बिशिष्ट अतिथी इनरुवा नगरपालिकाका प्रमुख केदार भण्डारी,उप्रमुख बिनिता कुमारी मेहता, नेपाल मुस्लिम संघ प्रदेश १ का सभापति हाँजी ईसराईल मन्सुरी, सुनसरीका प्रमुख जिल्ला अधिकारी इन्द्रदेव यादव, सुनसरीका प्रहरी प्रमुख संजयसिंह थापा लगायतकोे सहभागिता रहेको थियो ।
उक्त कार्यक्रम कोशी गाउँपालिकाका अध्यक्ष तथा नेपाली काँग्रेस सुनसरी क्षेत्र नं–४ का सभापति ऐयुव अंसारीको अध्यक्ष्तामा सम्पन्न भएको थियो ।
भिडियो : https://www.youtube.com/watch?v=Ehv_YfU2Jy4&t=29s
