टोमराज मेहता
इनरुवा । अगामी मंसिर ४ गते हुने प्रतिनिधि सभा र प्रदेश सभाका लागि सुनसरीको चारवटै निर्वाचन क्षेत्रबाट नेपाली कांग्रेसले उम्मेदवारहरुको नाम सिफारिस गरेको छ ।
नेपाली कांग्रेस सुनसरी क्षेत्र नम्बर १,२,३ र ४ को कार्यसमितिले प्रतिनिधि सभा र प्रदेश सभा तथा समानुपातितर्फका आकाँक्षी उम्मेदवारहरुको नामावली सर्वसम्मतबाट नेपाली कांग्रेस सुनसरीमा सिफारिस गरेको हो ।
नेपाली कांग्रेसले प्रतिनिधि सभा र प्रदेश सभाका उम्मेदवारहरुको नामावली समयमै पठाउन निर्देशन गरेपछि सुनसरीको चारवटै निर्वाचन क्षेत्रले सर्वसम्मतबाट नाम सिफारिस गरी नेपाली कांग्रेस जिल्ला कार्यसमिति सुनसरीमा पठाएको बुझिएको छ ।
नेपाली कांग्रेस सुनसरीको चारवटै क्षेत्रिय कार्यसमितिले बैठकबाट सर्वसम्मत निर्णय गरेर उम्मेदवारहरुको नाम सिफारिस गरेको नेपाली कांग्रेस क्षेत्रीय कार्यसमितिका सभापतिहरुले जनाएको छ । सुनसरीमा चारवटा संघीय निर्वाचन क्षेत्र र ८ वटा प्रतिनिधि सभामा आकाँक्षी उम्मेदवारहरुको नामावली संकलन गरेर सर्वसम्मतबाट नाम सिफारिस गरिएको छ ।
नेपाली कांग्रेस सुनसरी क्षेत्र नम्बर–१ ले प्रतिनिधि सभा सदस्यका लागि मीन विश्वकर्मा, लक्ष्मी खतिवडा, उमेश थापा,मीना सुब्बा र चन्द्र प्रसाद श्रेष्ठको प्रत्यक्षतर्फ नाम सिफारिस गरेको छ । सुनसरी क्षेत्र नम्बर–१(क) बाट नाम सिफारिस भएकाहरुमध्ये सुजेन्द्र तामाङ्ग र अनिल श्रेष्ठ बलियो उम्मेदवारको रुपमा प्रस्तुत भएको छ । त्यसैगरी सुनसरी क्षेत्र नम्बर–१ (ख) मा माधव घिसिङ्ग र तिलक राई बलियो उम्मेदवार भएकाले दुई मध्ये एक जनाले टिकट पाउने चर्चा छ ।
यसैगरी सुनसरी क्षेत्र नम्बर–२ मा नेपाली कांग्रेस क्षेत्रीय कार्यसमितिले प्रतिनिधि सभाका लागि राजीव कोइराला, राजीव ढुंगाना र सीताराम मेहताको नाम सर्वसम्मतबाट सिफारिस गरेको छ । मेहता सुनसरी क्षेत्र नम्बर–२ का प्रतिनिधि सभा सदस्य हुन् भने कोइराला प्रदेश सभा(ख) का प्रदेश सभा सदस्य हुन् ।
नेपाली कांग्रेस सुनसरी क्षेत्र नम्बर–२(क) बाट नाम सिफारिस गरेकाहरु मध्ये भीम पौडेल बलियो उम्मेदवार भएकाले टिकट पाउने निश्चित देखिएको छ । पौडेल उद्योग वाणिज्य संघ इटहरीका अध्यक्ष समेत हुन् । यसैगरी सुनसरी क्षेत्र नम्बर–२(ख) बाट प्रकाश मेहता र लाली प्रसाद मेहताबीच टिकटका लागि प्रतिस्पर्धा हुनेछ ।
यसैगरी नेपाली कांग्रेस सुनसरी क्षेत्र नम्बर–३ ले प्रतिनिधि सभा सदस्यका लागि बिजय कुमार गच्छारको एकल नाम सिफारिस गरेको छ । सुनसरी क्षेत्र नम्बर–३(क) मा नाम सिफारिस भएकाहरु मध्येबाट दीपक ढकाल र महेश बास्तोलाबीच टिकटका लागि प्रतिस्पर्धा हुनेछ । यसैगरी सुनसरी क्षेत्र नम्बर–३(ख) मा बीरेन्द्र कुमार शाहको टिकट पाउने सम्भावना बढी देखिएको छ । शाह नेपाली कांग्रेस सुनसरीको सचिव हुन् ।
नेपाली कांग्रेस सुनसरी क्षेत्र नम्बर–४ ले प्रतिनिधि सभा सदस्यका लागि सञ्चार तथा सूचना प्रविधि मन्त्री ज्ञानेन्द्र बहादुर कार्कीको नाम सर्वसम्मतबाट सिफारिस गरेको छ । नेपाली कांग्रेस सुनसरी क्षेत्र नम्बर–४ को आज बसेको बैठकले प्रतिनिधि सभा सदस्यका लागि सञ्चारमन्त्री कार्कीको एकल नाम सिफारिस गरेर जिल्ला कार्यसमितिमा पठाएको क्षेत्रीय सभापति ऐयुव अन्सारीले जनाएको छ । सञ्चार मन्त्री कार्की सुनसरी क्षेत्र नम्बर–४ का प्रतिनिधि सभा सदस्य हुन् । २०७४ सालको प्रतिनिधि सभाको निर्वाचनमा कार्की सुनसरी क्षेत्र नम्बर–४ बाट पाँच हजार भन्दा बढी मतले निर्वाचित भएका थिए ।
नेपाली कांग्रेस क्षेत्र नम्बर–४(क) नाम सिफारिस भएकाहरुमध्ये रेवति रमण दुलाल, उपेन्द्र कटुवाल, मनोज साह, सदानन्द मण्डलबीच टिकटका लागि प्रतिस्पर्धा हुनेछ । त्यसैगरी सुनसरी क्षेत्र नम्बर–४(ख) मा इसराईल मंसुरी बलियो उम्मेदवारका रुपमा देखा परेका छन् भने सूर्यदेव दास उराँव, हरिलाल मेहता र शत्रुघन यादव पनि टिकट पाउनेमा बिश्वस्त रहेका छन् ।
नेपाली कांग्रेस सुनसरी क्षेत्र नम्बर–४ ले संघीय प्रतिनिधि सभाका लागि समानुपतिकमा नौ जनाको नाम सिफारिस गरेको छ । समानुपातितर्फ डा.अबुल हुसैन अन्सारी, जमिल अन्सारी, राधिका कटुवाल, इरफान मियाँ, चनरदेव मेहता, मो.अल्लाउद्धिन हुसैन, डिल्ली कार्की, मीरा पोखरेल र टिका बहादुर कटुवाल रहेका छन् ।
नेपाली कांग्रेस सुनसरीमा क्षेत्र कार्यसमितिले सिफारिस गरेर पठाएको नामावलीहरुलाई पार्टीको पदीय हैसियत र मर्यादा क्रम अनुसार मिलाएर प्रदेश–१ कार्यसमितिले जस्ताको त्यस्तै पठाउने तयारी गरेको नेपाली कांग्रेस सुनसरीका सचिव वीरेन्द्र शाहले जानकारी दिएका छन् । शाहका अनुसार ८ वटै प्रदेश सभामा ७ जना भन्दा बढी र समानुपातिकमा ११ जना भन्दा बढीको नाम सिफारिस भएर आएको छ ।
