इनरुवा । आगामी मंसिर ४ गते हुने निर्वाचनका लागि सुनसरी क्षेत्र नम्बर–४(ख) प्रदेशसभा सदस्यका लागि नेपाली कांग्रेसको तर्फबाट हाजी ईस्राइल मंसुरीले उम्मेदवारी दर्ता गराएका छन् ।
मुख्य निर्वाचन अधिकृतको कार्यालय इनरुवा सुनसरी पुगेर हाजी मंसुरीले सुनसरी क्षेत्र नम्बर–४(ख) को प्रदेशसभा सदस्यका लागि उम्मेदवारी दर्ता गराएका हुन् । हाजी मंसुरी नेपाल मुस्लिम संघ प्रदेश १ का सभापतिको जिम्मेवारी सम्हाल्दै आएका छन् ।
नेपाली कांग्रेसको तर्फबाट टिकट पाएका मंसुरीले सुनसरी ४(ख) का लागि प्रदेशसभा सदस्य पदमा उम्मेदवारी दर्ता गरेपछि सर्वसाधारणहरु उत्साहित बनेका छन् । हाजी मंसुरीका समर्थकहरुले भोक्राहा नरसिंहको मोडेल चौकदेखी नाराबाजी गर्दै मुख्य निर्वाचन अधिकृतको कार्यालय इनरुवा सुनसरी पुगेका थिए ।
प्रदेशसभा सदस्यका लागि उम्मेदवारी दर्ता गरेपछि सञ्चारकर्मीहरुसँग कुरा गर्दै हाजी मंसुरीले सुनसरी खोलाको वर्षेनी सर्वसाधारणहरु डुवानमा पर्ने गरेकोले प्रमुख मुद्दाको रुपमा अगाडी सारिएको बताएका छन् ।
२०७४ को प्रदेशसभा को निर्वाचनमा नेपाली कांग्रेसको तर्फबाट हाजी ताहिर अन्सारीले गर्न नसकेको अधुरा कामलाई पूरा गर्ने थप जिम्मेवारी आएको समेत उनले बताए । शिक्षा,स्वास्थ्य र कृषि क्षेत्रलाई बढी प्राथमिकतामा राखी विकासका योजनाहरु ल्याई जनताको चाहना अनुसार काम गर्ने उनले प्रतिवद्धता व्यक्त गरेका छन् ।
मंसिर ४ गते हुने निर्वाचनमा नेपाली कांग्रेसको चुनाव चिन्ह रुख छापमा मतदान गरी नेपाली कांग्रेसका सबै उम्मेदवारहरुलाई विजयी बनाउन सबै मतदाताहरुलाई उनले अनुरोध समेत गरेका छन् । पार्टीभित्रको मनमुटावलाई अन्त्य गरी एक ढिक्का भई निर्वाचनमा उम्मेदवारहरुलाई बिजयी बनाउन सबैको दायित्व समेत भएको उनको जिकिर छ ।
