इनरुवा । सञ्चार तथा सूचना प्रविधि एवं कानुन मन्त्री ज्ञानेन्द्र बहादुर कार्कीले सुनसरी कर्मथलो र भोजपुर जन्मथलो भएको बताउनुभएको छ ।
सुनसरीको इनरुवामा आयोजित दीपावली र छठ पर्वको अवसरमा आयोजित शुभकामना आदान प्रदान कार्यक्रमलाई सम्वोधन गर्नुहुँदै मन्त्री कार्कीले सुनसरीलाई समृद्ध बनाउने जिम्मेवारी काँधमा आएको बताउनुभएको हो ।
नेपाली कांग्रेस सहितको सत्तारुढ गठबन्धनको तर्फबाट सुनसरी निर्वाचन क्षेत्र नम्बर–४ मा प्रतिनिधिसभा सदस्य पदका उम्मेदवार समेत रहनुभएका मन्त्री कार्कीले आप्mनो जन्मथलो भोजपुर जिल्ला भएपनि कर्मथलो सुनसरी जिल्लालाई बनाएको प्रष्ट पार्नुहुँदै यस क्षेत्रको समग्र विकास र समृद्धिका लागि निर्वाचनमा पुनः होमिएको बताउनुभयो ।
२०७२ सालमा संविधान जारी भएपछि पहिलो पटक २०७४ को प्रतिनिधिसभाको निर्वाचनमा सुनसरी निर्वाचन क्षेत्र नम्बर–४ बाट बिजयी भएको र यसपटक पनि जनताको विश्वास र अमूल्य मतबाट निर्वाचित हुने उहाँले बताउनुभयो ।
सुनसरी निर्वाचन क्षेत्र नम्बर–४ मा अहिले टुरिष्ट भनेर गलत प्रचार प्रसार गरेको प्रति ध्यानाकर्षण भएको मन्त्री कार्कीले बराहक्षेत्र नगरपालिका–१० प्रकाशपुरको बासिन्दा रहेको सर्वसाधारणहरुलाई जानकारी दिनुभयो । निर्वाचनको बेलामा गलत प्रचार प्रसारमा नलाग्न पनि उहाँले सबैलाई आग्रह गर्नुभयो । सुनसरीबाट चुनाव जितेपनि नजितेपनि बाँकी जीवन समाजसेवामा समर्पित रहने मन्त्री कार्कीको भनाई छ ।
नेपाल सरकारका प्रवक्ता तथा नेपाली कांग्रेसका केन्द्रिय सदस्य समेत रहनुभएका मन्त्री कार्कीले आगामी मंसिर ४ गते हुने प्रतिनिधिसभा र प्रदेशसभा निर्वाचनलाई निष्पक्ष, धाँधलीरहित, भयरहित वातावरणमा निर्वाचन सम्पन्न हुने विश्वास व्यक्त गर्नुभयो ।
नेपाली कांग्रेस सहितको सत्तारुढ गठबन्धनको तर्फबाट सुनसरी–४ मा प्रतिनिधिसभा सदस्य पदका उम्मेदवार मन्त्री ज्ञानेन्द्र बहादुर कार्की र नेकपा एमाले–जसपा गठबन्धनको तर्फबाट जगदीश प्रसाद कुसियैतबीच प्रतिस्पर्धा हुँदैछ ।
