इनरुवा । आगामी मंसिर ४ गते हुने प्रतिनिधिसभा र प्रदेशसभा निर्वाचनमा सुनसरी क्षेत्र नम्बर–४ मा सत्तारुढ गठवन्धनका साझा उम्मेदवार सञ्चार तथा सूचना प्रविधि मन्त्री ज्ञानेन्द्र बहादुर कार्कीले प्रतिस्पर्धा गर्न होइन्, विकास गर्न आएको बताउनुभएको छ ।
सुनसरीको बराहक्षेत्र नगरपालिका वडा नम्बर–९ मा आयोजित वडाभेलालाई सम्वोधन गर्नुहुँदै मन्त्री कार्कीले यसक्षेत्रको विकास गरेर देखाउने अठोट लिएको बताउनुभएको हो ।
नेपाली कांग्रेसका केन्द्रिय सदस्य तथा नेपाल सरकारका प्रवक्ता समेत रहनुभएका मन्त्री कार्कीले सुनसरी क्षेत्र नम्बर–४ मा असी प्रतिशत प्रतिवद्धता पूरा गरेको हुदाँ आगामी मंसिर ४ गते हुने निर्वाचनमा निर्वाचित गराउन मतदाताहरुलाई आग्रह गर्नुभएको हो ।
२०७४ सालको निर्वाचनमा सुनसरी क्षेत्र नम्बर–४ बाट निर्वाचित भएका मन्त्री कार्कीले पुनः यसपटकको निर्वाचनमा साझा उम्मेदवारका रुपमा देखिएकोले निर्धक्कसँग मतदान गर्न अपिल गर्नुभएको छ ।
नेकपा एमाले–जसपा गठबन्धनको तर्फबाट नेकपा एमालेका जगदीश प्रसाद कुसियैतले २०७४ को निर्वाचनमा सुनसरी–४(क) बाट निर्वाचित भएपछि साढे तीनवर्षमा प्रदेश एकको उद्योग पर्यटन वन तथा वातावरण मन्त्री भएरपनि देखिने खालको कुनै काम नगरेको उहाँले प्रष्ट पार्नुभयो ।
मन्त्री कार्कीले भन्नुभयो, ‘सुनसरी–४ मा कसैसँग मेरो प्रतिस्पर्धा छैन् । यसक्षेत्रको विकासका निमित पुनः यसपटक उम्मेदवार रहेको छु । जनताको अधुरा सपनालाई पूरा गर्नका लागि आएको छु । त्यसैले यसपटक सत्तारुढ गठबन्धनका साझा उम्मेदवार बनेकोले निर्वाचित गराउनुस्, विकासको जिम्मा म लिन्छु ।’
मन्त्री कार्कीले प्रतिस्पर्धीले जातीय सदभाव भड्काउने अभिव्यक्ति दिँदैमा जनताले नपत्याउने र उनी एजेण्डाबिहीन, इतिहास नभएकोले जनतामाझ झुठा आश्वासन बाड्ने काम मात्रै गरेकोले विश्वास नगर्न आग्रह गर्नुभयो । प्रदेश एकका पूर्वमन्त्री कुसियैतले आप्mनो क्षेत्रमा गरेका विकास मध्ये तीन वटा काम देखाउन मन्त्री कार्कीले चुनौती दिनुभएको छ ।
कोशी टप्पु वन्यजन्तु आरक्षबाट सर्वसाधारणहरु पीडा खेप्दै आएकोले यस आरक्षलाई राष्ट्रिय निकुञ्जमा परिणत गर्ने र पीडा नपाउने निकुञ्जका रुपमा यसलाई विकसित गर्ने समेत उहाँले बताउनुभयो ।
यसक्षेत्रको भाग्य र भविष्य बनाउनका लागि एकपटक पुनः निर्वाचित गराउनका लागि मन्त्री कार्कीले जनतालाई आग्रह गर्नुभएको छ ।
