नसीम अन्सारी
हरिनगरा । पछिल्लो समय विभिन्न राजनीतिक दल परित्याग गरी नेपाली काङ्ग्रेसमा प्रवेश गर्नेहरुको लहर बढ्दै गइरहेको छ । नेकपा एमाले,जनता समाजवादी पार्टीलगायतका विभिन्न राजनीतिक दलबाट असन्तुष्ट हुँदै धेरै नेता कार्यकर्ता काङ्ग्रेस प्रवेश गरिरहेका छन् ।
सोही क्रममा सुनसरीको हरिनगर गाउँपालिकास्थित घुस्कीमा शनिबार आयोजित एक कार्यक्रमका बीच हरिनगर गाउँपालीका क्षेत्रमा प्रभावकारी छवि बनाएका नेकपा एमाले र जसपा पार्टी परित्याग गर्दै २५० जना व्यक्ति नेपाली काङ्ग्रेसमा प्रवेश गरेका छन् ।
घुस्कीमा नेकपा एमाले र जसपा पार्टी प्रतियाग गरी नजान मियाँ र गियास मियाँको नेतृत्व तथा फिरोज सिद्दिकीको विशेष पहलमा २ सय ५० जना नेपाली काँग्रेस पार्टीमा प्रवेश गरेका छन् । उनीहरु नेपाली काँग्रेस पार्टी प्रवेश गर्नु अगाडी नेकपा एमाले र जसपा पार्टीमा आबद्ध रहेका थिए। दुवै मियाँ राजनितीमा मात्र होईन, समाजिक क्षेत्रमा पनि अत्यन्त सक्रिय छन् । मियाँ घुस्कीका जनता माझ निकै लोकप्रिय रहेका छन् ।
उनीहरुलाई सुनसरी क्षेत्र नम्बर ४ बाट प्रतिनिधिसभा सदस्य पदका उम्मेदवार सूचना,सञ्चार एवं प्रविधि,कानुन न्याय तथा संसदीय व्यवस्था मन्त्री ज्ञानेन्द्रबहादुर कार्की,नेपाली कांग्रेस सुनसरी क्षेत्र नम्बर ४ का सभापति ऐयुब अन्सारी,सुनसरी क्षेत्र नम्बर ४ ख का उम्मेदवार हाजी डाक्टर इसराइल मन्सुरी,गफार अन्सारी,नेपाली कांग्रेस हरिनगर गाउँपालीकाका सभापति नुनु अन्सारी,लगायतले नवप्रवेशीहरुलाई टीका र खादा लगाई पार्टी प्रवेश गराएका हुन् । मियाँसहित २ सय ५० जना नेपाली काँग्रेस पार्टीमा प्रवेश गरेका नेपाली काँग्रेसका वडा सचिव जुवेर अन्सारीले बताएका हुन ।
नवप्रवेशीहरुलाई पार्टी प्रवेश गराउदै उक्त कार्यक्रमका प्रमुख अतिथि मन्त्री कार्कीले नेपाली काङ्ग्रेस पार्टी सधैँ गरिब, दलित, अन्याय, अत्याचार विरुद्ध लड्ने पार्टी भएकोले पछिल्लो समय काङ्ग्रेस प्रति सर्वसाधारणको क्रेज बढ्दै गएको बताए ।
सुनसरी क्षेत्र नम्बर ४ मा आफूले विकास निर्माणकार्यका साथै संगठनलाई चुस्त दुरुस्त बनाउदै निरन्तर काम गरिरहेकाले त्यसको परिणामस्वरूप सर्वसाधारण जनताको क्रेज काङ्ग्रेसप्रति बढ्नु स्वभाविक भएको क्षेत्रीय सभापति ऐयुब अन्सारी बताउँछन् । विभिन्न पार्टी परित्याग गरी नेपाली काङ्ग्रेसमा प्रवेश गर्नेहरुलाई उनीहरूको क्षमता र आवश्यकताअनुसार जिम्मेवारी दिइने सभापति अन्सारीको कथन छ ।
