प्रमोद यादव
इनरुवा । आगामी मंसिर ४ गते प्रतिनिधिसभा र प्रदेशसभाको निर्वाचन हुँदैछ । निर्वाचनको मुखमै आएर अहिले सुनसरी निर्वाचन क्षेत्र न.ं ४ मा नेकपा एमालेका नेता कार्यकर्ताहरुले पार्टी छाड्न थालेपछी नेकपा एमालेका उम्मेदवार संकटमा पर्न थालेको चर्चा सूरु भएको छ ।
निर्वाचनको मुखमा सुनसरी–४ मा नेकपा एमालेका नेता कार्यकर्ताहरुले सामुहिक रुपमा पार्टी छोड्न थालेपछी अहिले नेकपा एमाले सुनसरी–४ का प्रतिनिभिसभा सदस्य पदका उम्मेदवार जगदिश प्रसाद कुसियैत र प्रदेशसभा सुनसरी–४ (ख) का उम्मेदवार हाजी अब्बास अन्सारीलाई निर्वाचन जित्न निकै संकटको सामना गर्नुपर्ने जानकारहरु बताउँछन् ।
सुनसरी क्षेत्र नम्बर–४ मा नेकपा एमालेका प्रतिनिधिसभा सदस्यका उम्मेदवार जगदिश प्रसाद कुसियैत र प्रदेश सभा सुनसरी–४ (ख) का उम्मेदवार हाजी अब्बास अन्सारीले चुनावी अभियान सूरु गरेसँगै सो क्षेत्रमा नेकपा एमालेका नेता कार्यकर्ताहरुमा एमाले पार्टी परित्याग गर्ने होडबाजी नै चलिरहेको छ । चुनावको मुखमा पार्टी परिवर्तन गर्ने सो क्षेत्रका एमालेका नेता कार्यकर्ताहरुले सिद्धान्त वा विचारको राजनीति त्यागेर अवसरको खोजी गरिरहेको देखिन्छ ।
आगामी मंसिर ४ गते हुने प्रतिनिधिसभा र प्रदेशसभाको निर्वाचनका लागि नेपाली काँग्रेसका सुनसरी क्षेत्र नम्बर–४ का प्रतिनिधिसभा सदस्य पदका उम्मेदवार ज्ञानेन्द्र बहादुर कार्की सो क्षेत्रमा नेता कार्यकर्ता सहित चुनावी प्रचारका लागि गाउँगाउँ पुगिरहेका छन् । चुनावी प्रचारका लागि सो क्षेत्रका गाउँगाउँ पुग्दा काँग्रेसका उम्मेदवार ज्ञानेन्द्र बहादुर कार्की जनताको साथ र सर्मथन बढ्दै गएको छ भने सुनसरी क्षेत्र नम्बर–४ का नेकपा एमालेका नेता कार्यकर्ताहरुले एमाले पार्टी धमाधम छाड्न थालेका छन् ।
सुनसरीको भोक्राहा नरसिंह गाउँपालिकाका नेकपा एमालेका ईञ्चार्ज तथा जिल्ला सदस्य रमेश कुमार यादव सहित दर्जनौ एमाले नेता कार्यकर्ता आईतबार एमाले पार्टी छोड्दै नेपाली काँग्रेसका उम्मेदवार ज्ञानेन्द्र बहादुर कार्कीलाई समर्थन गर्दै नेपाली काँग्रेसमा प्रवेश गरे ।
त्यसैगरी केही दिन अगाडी सम्म एमालेका सुनसरी क्षेत्र नम्बर–४ (ख) उम्मेदवार हाजी अब्बास अन्सारीको चुनावी प्रचार प्रसार अभियान कार्यक्रममा सँगै देखीएका हरिनगर गाउँपालिकाका एमालेका युवा नेता अन्सार अन्सारीले पनि पार्टी फेरेका छन् ।
अन्सारीले एमाले पार्टी परित्याग गरेका छन् । चुनावको मुखमा एमाले छोड्दै उनि सहित दर्जनौ काँग्रेसमा प्रवेश गरेका हुन् । एमाले छाडेर कांग्रेस प्रवेश गर्दै एमाले भोक्राहा नरसिंहका ईञ्चार्ज रमेश कुमार यादवले राजनीतिज्ञमा हुनुपर्ने गुण कांग्रेसका नेताहरुमा मात्रै भएकाले पार्टी परिवर्तन गरेको बताए । निर्वाचन नजिकिएसँगै सुनसरी क्षेत्र नम्बर–४ एमाले पार्टीमा बर्षोदेखी लागेका नेता÷कार्यकर्ताहरु एमाले पार्टी छाड्दै बिभिन्न दलमा प्रवेश गर्न थालेका हुन् ।
सुनसरी क्षेत्र नम्बर–४ मा नेपाली काँग्रेसका उम्मेदवार तथा नेपाल सरकारका प्रवक्ता तथा सञ्चारमन्त्री कार्कीले पार्टी प्रवेशको अभियान चलाइरहेको छ । त्यसका लागि काँग्रेस केन्द्रिय सदस्य समेत रहेका उम्मेदवार कार्की आफै निर्वाचन क्षेत्र दौडाहमा छन् । काँग्रेसले ठूलै तामझाम गरेर नेकपा एमालेका भोक्राहा नरसिंह ईञ्चार्ज रमेश कुमार यादवलाई नेकपा एमाले पार्टीबाट आफ्नो दलमा भित्राएको छ ।
एमाले छोड्दै काँग्रेस प्रवेश गरेका एमाले ईञ्चार्ज यादवले आफू काँग्रेसका नेता ज्ञानेन्द्र बहादुर कार्कीको व्यक्तित्वबाट पहिले देखि नै प्रभावित रहेको बताए । एमालेमा अहिले पनि पक्षपातीकै राजनीति भईरहकाले पक्षपातीको राजनीति गर्ने पार्टी कहिले पनि राष्ट्रिय पार्टी हुन नसक्ने उनको भनाई छ ।
नेकपा एमाले सुनसरी क्षेत्र न.ं ४ को पार्टीभित्रको असन्तुष्टीको प्रभाव तथा लगातार एउटै व्यक्ति र उनको परिवारले मात्रै अवसर पाउने गरेको भन्दै सो क्षेत्रका एमाले नेता कार्यकर्ताहरु अहिले पार्टी फेर्न थालेका हुन् । यसअघि सुनसरीको हरिनगर गाउँपालिका वडा नम्बर–७ घुस्की बिक्रमपुरमा दुईसय ५० जना नेकपा एमाले र जनता समाजवादी पार्टी परित्याग गरि नेपाली कांग्रेसमा प्रवेश गरेका थिए । सो कार्यक्रममा पनि मन्त्री कार्कीले कांग्रेस प्रवेश गरेकाहरुलाई अविर र खदा लागएर स्वागत सम्मान गरेका थिए ।
