नसीम अन्सारी
इनरुवा । नेकपा एकीकृत समाजवादी पार्टीका केन्द्रिय सदस्य महफुज अन्सारीले सुनसरी क्षेत्र नम्बर–४ बाट नेकपा एमालेलाई ठेगान लगाउने बताएका छन् । सुनसरीको कोसी गाउँपालिकाको लौकहीमा आयोजित नेपाली कांग्रेस सुनसरी क्षेत्र नम्बर–४ को विशाल आमसभालाई सम्वोधन गर्दै अन्सारीले मंसिर ४ गतेको निर्वाचन पछि नेकपा एमालेलाई लोकतान्त्रिक बाम गठवन्धनले ठेगान लगाएर छाड्ने बताएका हुन् ।
मंसिर ४ को निर्वाचनपछि नेपाली काँग्रेसको नेतृत्वमा लोकतान्त्रिक बाम गठबन्धनको सरकार बन्नेमा कुनै शंका नगर्न सर्वसाधारणहरुलाई आग्रह गर्दै नेपाली कांग्रेसका उम्मेदवारहरुलाई मतदान गरि निर्वाचित गराउन उनले अपिल गरेका छन् । कसेको हावादारी गफमा नलाग्न सबैलाई अपिल गर्दै चुनावपछि एमाले अध्यक्ष केपी शर्मा ओली नेतृत्वको सरकार बन्ने कुनै सम्भावना नरहेको दाबी समेत उनले गरेका थिए ।
अन्सारीले जतिसुकै धाक लगाएपनि ओलीको नेतृत्वमा सरकार नबन्ने ठोकुवा गरेका छन् । यदि कसैमा भ्रम छ भने त्यो सपना त्यागिदिए हुन्छ’ अन्सारीले भने, ‘चुनावपछि गठबन्धनकै सरकार फेरि बन्दै छ । त्यसैले गठबन्धनको एकताबद्ध देखाउन तीन जना उम्मेदवारलाई भोट हाल्नुपर्छ । सबैले तलमाथि नगरौं गठबन्धनलाई भोट हालेर जिताउनुपर्छ ।’
सुनसरी क्षेत्र नम्बर ४ मा लोकतान्त्रिक बाम गठबन्धनको तर्फबाट ३ वटै सिटमा नेपाली काँग्रेसले टिक पाएतापनि हाम्रो साझा उम्मेदवार रहेको उनले बताए । नेकपा एसले पनि पूर्णरुपले समर्थन गरेको कुरा उनले बताए ।
त्यसकारण काँग्रेस, माओवादी एकीकृत समाजवादीका नेता कार्यकर्ता शुभेच्छुकले हाम्रो प्रतिनिधि सभा सदस्यका उम्मेदवार सञ्चार तथा सूचना प्रविधि मन्त्री एवम् सरकारका प्रवक्ता ज्ञानेन्द्र बहादुर कार्कीलाई, प्रदेश सभा (क) मा सदानन्द मण्डल र (ख) मा डा. हाजी इस्राईल मंसुरीसहित तीनै जनालाई नेपाली कांग्रेसको चुनाव चिन्ह रुख छापमा मतदान गर्न अन्सारीले आग्रह गरे । तर समानुपातिकतर्फ भने आ–आफ्नो पार्टीलाई मत हाल्न अन्सारीले सुझाव दिए । यस क्षेत्रबाट मन्त्री कार्की निर्वाचित भएपछि जनताको समस्या समाधान गर्न पछि नहटने उनले ठोकुवा गरे ।
