सुनसरी । नेपाली कांग्रेसका केन्द्रीय सदस्य तथा पूर्व सञ्चारमन्त्री ज्ञानेन्द्रबहादुर कार्कीले राष्ट्रपतिका लागि सर्वस्वीकार्य व्यक्ति आफ्नो पार्टीमा मात्रै रहेको दावी गरेका छन् ।
सुनसरीको हरिनगर गाउँपालिकाको प्रशासकीय भवन शिलान्यास समारोह कार्यक्रमलाई सम्वोधन गर्दै कार्कीले राष्ट्रपतिमा आफ्नो पार्टीलाई सर्वस्विकार्य बनाउन काँग्रेसले प्रधानमन्त्री पुष्पकमल दाहाल प्रचण्डलाई विश्वासको मत दिएको बताएका हुन् ।
प्रतिनिधिसभाका सदस्य समेत रहेका पूर्वमन्त्री कार्कीले एमाले अध्यक्ष केपी ओलीले राष्ट्रपतिमा आफ्नो पार्टीको उम्मेदवारमा राष्ट्रिय सहमती हुन्छ भनेर बालहठ देखाएको जिकीर गर्दै त्यसले मुलुकलाई अघि बढाउन नसक्ने बताए ।
उनले भने, ‘राष्ट्रपति मैले खडा गरेको व्यक्तिलाई मात्रै भोट दियो भने राष्ट्रिय सहमति हुन्छ भन्नु त्यो बालहठ हो । र, त्यो बालहठले मुलुक अगाडि बढन सक्दैन । र, यो सम्मानित संस्थाको नेतृत्व सर्वस्वीकार्य व्यक्तिले गर्नु पर्नेछ । त्यो व्यक्तित्व नेपाली काँग्रेस भित्र नै छ भन्ने कुरा पनि म यहाँहरुलाई निवेदन गर्न चाहन्छु । त्यही कारणले हामीले प्रतिनिधिसभाको बैठकमा वर्तमान प्रधानमन्त्री पुष्पकमल दाहालले विश्वासको मत माग्दै गर्दाखेरी हामीले विश्वासको मत दिएका हौं ।’
काँग्रेस नेता कार्कीले सत्ताका लागि आफ्नो पार्टीले मरिहत्ते गर्नुपर्ने अवस्था नरहेको बताए । काँग्रेसले सत्ता खोजेर नहिँड्ने तर त्यो आफैं आउने उनको बुझाई थियो ।
हरिनगर गाउँपालिकाका अध्यक्ष हाजी गफार अन्सारीको अध्यक्षतामा सम्पन्न भएको सो कार्यक्रममा प्रदेश सांसदहरु सदानन्द मण्डल, हाजी इसराईल मन्सुरी, जिल्ला समन्वय समिति सुनसरीका प्रमुख राजन मेहता, सुनसरीका प्रंमुख जिल्ला अधिकारी हुमकला पाण्डे र पुर्व प्रदेश सांसदहरु हाजी ताहिर अन्सारी,राजीव कोइराला लगायतको सहभागिता रहेको थियो ।
त्यसैगरी सो कार्यक्रममा हरिनगर गाउँपालिकाकी उपाध्यक्ष रिमझिम कुमारी भगत, कोसी गाउँपालिकाका अध्यक्ष ऐयुव अन्सारी, जग्गादाता तौलाराम सेठिया र हरिनगर गाउँपालिकाका सातै वटा वडाका वडाध्यक्षहरु र बिभिन्न पार्टीका प्रतिनिधिहरुको सहभागिता समेत थियो ।
