टोमराज मेहता
काठमाडौं । नेपाली कांग्रेसका सभापति एवं पूर्व प्रधानमन्धी शेरबहादुर देउवाले वीपी कोइरालाको बिचार र आदर्श कुरा सदैव अनुकरणीय रहेको बताउनुभएको छ ।
नेपाली कांग्रेस सुनसरीले वीपी स्मृति दिवसको अवसरमा आज इनरुवामा आयोजित कार्यक्रमलाई सम्वोधन गर्नुहुँदै सभापति देउवाले वीपी कोइरालासहित स्र्वगिय गिरिजा प्रसाद कोइराला र सन्त नेता कृष्णप्रसाद भट्टराईले देखाएको लोकतन्त्रलाई संस्थागत गर्ने बाटोमा वर्तमान पुस्ता मार्गदर्शनका रुपमा लिएर अगाडी बढ्नुपर्ने बताउनुभयो ।
सभापति देउवाले मुलुकमा स्थायि शान्तिको स्थापना र जनताको समुन्नत नेपालको चाहनालाई पूरा गर्ने गरी नेपाली कांग्रेस ठूलो पार्टी भएका नाताले अझै प्रभावकारी भूमिका साथ अगाडी बढ्ने पनि बताउनुभयो ।
पार्टीको जिल्ला सम्मेलनको सन्दर्भमा पार्टीको सुनसरी जिल्ला कार्यसमितिले आयोजना गरेको त्यस कार्यक्रममा नेपाली कांग्रेसका नेता एवं पूर्व उपप्रधानमन्त्री बिजय कुमार गच्छदारले कांग्रेसका नेता तथा कार्यकर्ता एकजुट रहदाँसम्म कांग्रेसलाई कसैले पनि सिध्याउन नसक्ने र कांग्रेस एक नम्बरको पार्टी रहिरहने बताउनुभयो ।
त्यस अवसरमा पार्टीका केन्द्रिय सदस्य एवं पूर्वमन्त्री ज्ञानेन्द्रबहादुर कार्कीले कांग्रेसलाई अगाडी बढाउन एक आपसका अन्तकलहलाई त्यागेर लोकतन्त्र र समाजवादका लागि पूर्ण प्रतिवद्ध भएर अगाडी बढ्नुपर्ने बताउनुभयो ।
आजै पार्टी सभापति देउवाले इनरुवा नगरपालिका वडा नम्बर–९ बवियामा वीपी कोइरालाको पूर्णकदको सालिक समेत अनावरण गर्नुभयो भने पार्टीमा विशिष्ट योगदान पुर्याउने जिल्लाका केही नेता तथा कार्यकर्तालाई सम्मान पनि गर्नुभयो ।
नेपाली कांग्रेस सुनसरीका सभापति केदार भण्डारीको सभापतित्वमा सम्पन्न कार्यक्रममा पार्टीका नेताहरु भीष्मराज आङदाम्बे, रमेशजंग रायमाझी, राजिव कोइराला, सिताराम मेहता, राजिव ढुंगाना, अमृत अर्याल, मीन विश्वकर्मा, लक्ष्मी खतिवडा, उद्धव थापा, राजन मेहता, ऐयुव अन्सारी, पंकज महतो, बीरेन्द्र साह लगायतले वीपी विचारका बारेमा धारणा राख्नुभएको थियो । सभार : रेडियो नेपाल
फोटो : बीरेन्द्र साह/डा.अबुल हुसेन अन्सारी सुनसरी ।
