टाेमराज मेहता
सुनसरी । नेपाली काङ्ग्रेसको भातृ संगठन नेपाल मुस्लिम संघकाे तेस्रो केन्द्रीय महाधिवेशनमा सुनसरीबाट चारजना मुस्लिम नेताहरु सम्मानित भएका छन् ।
काठमाडौंको राष्ट्रिय सभा गृहमा नेपाल मुस्लिम संघको तेस्रो महाधिवेशनको अवसरमा विभिन्न क्षेत्रमा योगदान पुर्याएको भन्दै सुनसरीका चारजना सम्मानित भएको हो ।
सम्मानित हुनेहरुमा नेपाली काङ्ग्रेस सुनसरी क्षेत्र नम्बर-४(ख) का प्रदेशसभा सदस्य हाजी इस्राइल मन्सुरी, हरिनगर गाउँपालिकाका अध्यक्ष हाजी गफार अन्सारी, कोशी गाउँपालिकाका अध्यक्ष ऐयुव अन्सारी र दुहबीका नेता अब्दुल राइन गरी सुनसरीबाट ४ जनालाई नेपाली काङ्ग्रेस पार्टीका सभापति एवं पुर्व प्रधानमन्त्री शेरबहादुर देउवाले सम्मानित गरेको हो ।
प्रदेशसभा सदस्य मन्सुरीले प्रतिनिधि तथा प्रदेशसभा सदस्य निर्वाचन २०७९ मा सुनसरी क्षेत्र नम्बर-४(ख) बाट निर्वाचित भएको र कोशी प्रदेशसभामा ज्येष्ठ सदस्यको हैसियतले अध्यक्षताको जिम्मेवारी पाएकोले भुमिका राम्रोसँग निर्वाह गरेको भन्दै दोसल्ला र सम्मान पत्रबाट सम्मानित भएको आयोजकले जनाएको छ ।
नेपाल मुस्लिम संघ कोशी प्रदेशका अध्यक्ष समेत रहेका प्रदेशसभा सदस्य मन्सुरीलाई कोशी प्रदेशको १४ वटै जिल्लामा संगठन विस्तार र सुदृढीकरणमा उत्कृष्ट प्रदेशको रुपमा चिनाउन सफल भएकोमा उनलाई महाधिवेशनमा सम्मानित गरिएको हो ।
त्यसैगरी हरिनगर गाउँपालिकाका अध्यक्ष हाजी गफार अन्सारीले हरिनगर गाउँपालिकामा दोस्रो पटक निर्वाचित हुन सफल भएकोमा र मुलुकभरीमा हरिनगर गाउँपालिकामा विकास र योजनाका गतिविधिहरु सञ्चालन गरी नमुना विकास गरेको भन्दै नेपाल मुस्लिम संघ उच्च सम्मानका साथ दोसल्ला र सम्मान पत्रले सम्मानित गरेको हो ।
त्यसैगरी कोशी गाउँपालिकाका अध्यक्ष ऐयुव अन्सारीले पनि स्थानीय तहको निर्वाचनमा दोस्रो पटक निर्वाचित भएको र प्रतिनिधिसभा र प्रदेशसभा निर्वाचनमा उम्मेदवारहरुलाई विजयी गराउन सफल भएको भन्दै नेपाल मुस्लिम संघले सम्मानित गरेको हो ।
नेपाली काङ्ग्रेस सुनसरी क्षेत्र नम्बर-४ का क्षेत्रीय सभापति समेत रहेका अन्सारीले सुनसरी क्षेत्र नम्बर-४ मा प्रतिनिधिसभा सदस्य ज्ञानेन्द्रबहादुर कार्की,प्रदेशसभा (क) मा सदानन्द मण्डल र प्रदेशसभा (ख) हाजी इस्राइल मन्सुरीलाई निर्वाचित गराउन सफल भएको थियाे ।
कुशल नेतृत्वको पहिचान दिन सकेको र सुनसरीमा चारवटा निर्वाचन क्षेत्र मध्ये सुनसरी-४ मा उम्मेदवारहरु निर्वाचित भएको र बाकी रहेको निर्वाचन क्षेत्रमा नेपाली काङ्ग्रेसका उम्मेदवार पराजित भएको हुँदा सुनसरीको इज्जत र गरिमा बढाउन अन्सारीको भुमिका अपरिहार्य रहेको भन्दै सम्मानित गरिएको हो ।
त्यसैगरी दुहबीका अगुवा नेता राइनले प्रजातन्त्र स्थापना गर्न जेलदेखी गोलि खाएको हुँदा र नेपाली काङ्ग्रेस पार्टीमा ठुलो योगदान दिएकोले नेपाल मुस्लिम संघले योगदानको कदर गर्दै सम्मान गरिएको संघले जनाएको छ ।
नेपाल मुस्लिम संघको तेस्रो केन्द्रिय महाधिवेशनबाट नयाँ नेतृत्व चयन गर्नेछन् ।
